Barbanza, por Certo

5.11.10

Muros: o Concello homenaxea ao polígrafo noiés Xosé Agrelo Hermo cun busto na alameda

Noia, 5 de novembro de 2010. O vindeiro sábado 13 de novembro, ás cinco da tarde, terá lugar na alameda de Esteiro, en Muros, o descubrimento dun busto que homenaxea a figura do intelectual noiés Xosé Agrelo Hermo, falecido o 21 de novembro de 2006.

Non sabes quen era Xosé Agrelo? Consulta a Galipedia, aquí

Posted via email from Certo.gl, o xornal dixital de Barbanza e Noia

4.11.10

Barbanza-Noia: o delegado territorial da Xunta en Coruña, Diego Calvo, di que os orzamentos para a zona "crearán emprego"

A Consellería de Medio Ambiente, Territorio e Infraestruturas investirá 14,6 millóns de euros en infraestruturas viarias, entre as que destacan a conexión do corredor Brión-Noia coa estrada AC-550 en Taramancos, que contará cun investimento de 7,8 millóns de euros, e a mellora do firme na estrada AC-550 en Muros, con 4,7 millóns de euros de inversión

Augas de Galicia consigna unha partida orzamentaria de 7,4 millóns para o saneamento integral das rías. En Muros, o ente autónomo destinará 1,5 millóns de euros para a mellora das infraestruturas hidráulicas; en Porto do Son, 1,9 millóns de euros nos colectores das EDAR de Tarrío e Porto do Son, e en Ribeira, as obras de saneamento contarán cunha partida de 1,3 millóns de euros

Portos de Galicia acometerá traballos de mellora e ampliación das instalacións portuarias por importe de preto de 4,5 millóns de euros en nove concellos da comarca, entre os que destacan os 1,6 millóns para a dársena de Muros e os preto de 500.000 euros para a ampliación do porto noiés

En materia social, o delegado lembrou que a Consellería de Traballo e Benestar destinará 106 millóns de euros en toda a provincia para políticas activas de emprego e 152 millóns en materia de benestar

Diego Calvo, nunha foto de arquivo

Boiro, 4 de novembro de 2010.- O delegado territorial da Xunta na Coruña, Diego Calvo, destacou esta mañá en Boiro que estes investimentos “ademais de impulsar as infraestruturas, permitirán a creación de moitos postos de traballo na comarca do Barbanza”, o que favorecerá á mellora da actividade económica na zona nun momento de crise.

Así, a Consellería de Medio Ambiente, Territorio e Infraestruturas investirá 14,6 millóns de euros en infraestruturas viarias na comarca durante o próximo ano. Destacan os 7,8 millóns de euros da conexión do corredor Brión-Noia coa estrada AC-550 en Taramancos e que permitirá mellorar as comunicacións con Santiago de Compostela, e os 4,7 millóns de euros para o reforzo do firme e optimización da sinalización na AC-550 en Muros, que se realizará con cargo aos fondos da Sociedade Pública de Investimentos. A adecuación da AC-303 entre o Hospital Comarcal e Corrubedo, terá tamén unha partida da Consellería de 114.000 euros.

Zona da Ribeiriña, na Pobra do Caramiñal

O organismo autónomo Augas de Galicia consigna no próximo exercicio unha partida orzamentaria de 7,4 millóns para o saneamento integral das rías. En Muros, o ente autónomo destinará 1,5 millóns de euros para os colectores e as estacións depuradoras de Muros e Esteiro, así como para a mellora das infraestruturas hidráulicas en varias rúas da vila. En Porto do Son hai unha partida de 1,9 millóns para os colectores e as depuradoras de Tarrío e Porto do Son. En Ribeira, os traballos de saneamento, que inclúen actuacións nos colectores xerais de Ribeira e Corrubedo e a creación dunha liña independente dende Pantín ata o bombeo de Pedra Patieira, contarán cunha partida de 1,3 millóns de euros. Augas de Galicia tamén recolle un investimento de 466.000 euros no saneamento da Ribeiriña, en A Pobra, e 360.000 euros para o de Leiro e Isorna, en Rianxo, entre outras actuacións. Calvo lembrou que a mediados deste mes comezarán as obras da segunda fase de saneamento no río Coroño, en Boiro. Augas de Galicia vén de adxudicar estes traballos por un importe de 730.500 euros. O obxectivo é instalar unha rede de colectores residuais nos núcleos de Mieites, Comoxo e A Cuncheira.

Portos de Galicia contempla un investimento de preto de 4,5 millóns de euros para traballos de ampliación e mellora das instalacións portuarias de nove concellos da comarca. Destacan os 1,7 millóns de euros para a ordenación interior de atraques no porto de Muros e os preto de 500.000 euros para a ampliación das instalacións para embarcacións menores no de Noia. En Boiro, o investimento de Portos alcanzará os 650.000 euros, dos que 310.000 corresponderán á remodelación dos atraques no porto de Escarabote.

Pola súa banda, o investimento da Consellería do Mar na comarca para 2011 ascende a 1,4 millóns de euros e contempla actuacións nas instalacións dos servizos de Gardacostas; relativas á mellora do servicio de salvamento e loita contra a contaminación en Ribeira e Porto do Son e tamén vinculadas a ensinanzas náutico-pesqueiras.

Durante a súa visita a Boiro, o delegado lembrou que a todas estas cifras hai que engadir os 106 millóns de euros que destina a Consellería de Traballo en toda a provincia a políticas activas de emprego ou os 152 millóns de euros en materia de Benestar.

“Todas estas actuacións –sinalou- teñen como obxectivo primordial dar resposta as principais demandas dos concellos, impulsando proxectos clave para a comarca como o corredor Brión-Noia e a variante de Noia, o saneamento integral das rías ou as intervencións en materia portuaria”. Trátase, en definitiva, de mellorar a calidade de vida dos veciños do Barbanza e “xerar novas oportunidades e postos de traballo cun investimento eficiente e realista”.

Neste senso, Calvo gabou o esforzo realizado pola Xunta para coordinar aos distintos departamentos e cadrar con eles unhas contas “coherentes, sustentables, austeras e pegadas ao actual momento económico, nas que quedan garantidas a continuidade dos proxectos prioritarios do Barbanza”. Calvo lembrou tamén “o recorte de 1.177 millóns de euros por parte do Goberno central nos fondos que lle correspondían a Galicia”.

Visita CEIP Santa María do Castro en Boiro

Na visita ao CEIP Santa María do Castro, onde estivo acompañado pola xefa de Educación, Teresa Villaverde, polo alcalde de Boiro, Xosé Deira, e outros membros da corporación, Diego Calvo puido comprobar o resultado dos traballos realizados durante os meses de verán que, cun investimento de preto de 95.000 euros, permitiron reparar e substituír a cuberta do polideportivo do centro.

O delegado lembrou que Educación investiu 352.000 euros para a realización de traballos de mellora en cinco centros de ensino de Boiro durante o verán. Ademais do CEIP Santa María do Castro, no CEIP de Praia Xardín realizáronse traballos de adecuación do patio infantil; no CEIP de Escarabote, a construción de aseos en tres aulas de Infantil; no CEIP de Cespón, o acondicionamento do patio de xogos, e no IES Praia de Barraña, a substitución da carpintería exterior e a reforma dos vestiarios.
En total, na comarca do Barbanza, Educación investiu preto de 1,6 millón de euros en traballos de renovación e mellora nos centros de ensino. Calvo destacou que estas actuacións permitirán que os máis pequenos “poidan desenvolver as súas actividades nas mellores condicións” e, ao mesmo tempo, dar resposta ás necesidades do centro e ás demandas de pais e educadores.

Posted via email from Certo.gl, o xornal dixital de Barbanza e Noia

A Pobra do Caramiñal: o sábado 6 de novembro, representación de Smóking no teatro Elma

A Pobra, 4 de novembro de 2010. Este sábado, 6 de Novembro, ás 20:30 horas, haberá unha representación de "Smóking". de Santiago Moncada, no teatro Elma da Pobra do Caramiñal a cargo do Grupo Teatro Liceo de Noia, baixo a dirección do escritor e actor Ramón Carredano.
Esta agrupación teatral acadou o 2º premio e 4 nominacións a actores destacados por "Smóking" no XIII certame de Teatro Afeccionado D. Bosco da Coruña. Non é apta para menores de 14 anos.

Sinopse

Glamourosa comedia na que priman a resistencia a entrar na idade de xubilación; o respecto e admiración dos xóvenes polas formas de facer dos maiores e a amizade entre dous homes na plena madurez..
A acción ten lugar integramente nun salón de ambientación moderna, de luxo e seducción, na vivenda dun prestixioso arquitecto, maduro, atractivo, interesante e sempre disposto á aventura. Un arquitecto que ten éxito coas mulleres, cunha vida familiar estable e feliz.
Aparentemente. o protagonista dispón de todo e está convencido de que todas as mulleres con encanto se encaixan perfectamente a el. Imposible para o arquitecto imaxinar o xeito de pasar o resto da vida sen a súa dona, compartindo piso co seu mellor amigo.

“Smóking” é unha comedia na que destacan o seus excelentes e intelixentes diálogos, mergullados no cinismo.

Posted via email from Certo.gl, o xornal dixital de Barbanza e Noia

Boiro: o club de lectura infantil bota a andar o 11 de novembro como nova alternativa de ocio

O club de lectura para rapaces de Boiro está destinado aos de quinto e sexto de Primaria

Boiro, 4 de novembro de 2010. A Biblioteca Municipal do Concello de Boiro, baixo a coordinación de Anxo Campos, promove a creación dun club de lectura para rapaces, que ten como obxectivo gozar da lectura e do contacto cos libros, ofrecer novas posibilidades para o tempo libre, e potenciar a biblioteca como un bo sitio para atoparse con outros rapaces e compartir o tempo e o gusto pola lectura.
As sesións do club, que comezará a súa andaina o vindeiro 11 de novembro, desenvolveranse os xoves de 6 a 7 da tarde. Hai que inscribirse na biblioteca municipal (Casa da Cultura) ou no teléfono 981 8484 10. Está destinado a rapaces de 5º e 6º de Educación Primaria.

Bule con Alcer: comezan hoxe as actividades

Por outra banda, hoxe, xoves 4 de novembro, comezan ás cinco e media da tarde no Centro social de Boiro as actividades inseridas no programa "Bule con Alcer", que programa a Deputación da Coruña e a Asociación de Loita contra Enfermidades do Ril xunto co Concello boirense. Estarán na inauguración o alcalde, a concelleira de Servizos Sociais e a deputada provincial Rosana Pérez.

Exposición de pinturas de Kukas, no Centro Social

O artista Marcelino de Santiago Viquera, máis coñecido como Kukas, expón pinturas no centro social dende este venres 5 de novembro. A inauguración é ás doce da mañá, co alcalde e o concelleiro de Cultura como anfitrións. Se queres saber quen é Kukas, aquí está o seu curriculum.

Antes publicamos:

Biblioteca: contacontos e club de lectura para fomentala. Os xoves

Bule con Alcer: programa aberto a enfermos crónicos

- MAÑÁ VENRES, DÍA 5 DE NOVEMBRO, ÁS 18.00 HORAS NA SEDE DA ASOCIACIÓN DE MEXILLOEIROS DE CABO DE CRUZ (AMC), celebrarse a entrega de premios do concurso de tapas feitas con mexillón que organizou a Concellería de Turismo do Concello de Boiro, e que se desenvolveu a fin de semana pasada. Asistirá o Alcalde, Xosé Deira Triñanes, e a Concelleira de Turismo, Francisca Suárez Lijó.

Saúdos,

Ana Fernández Neira

Gabinete de Alcaldía

Telf. 981 847034

alcaldia@boiro.org

Posted via email from Certo.gl, o xornal dixital de Barbanza e Noia

3.11.10

Dodro: trinta e tres familias resultaron beneficiadas este curso polas axudas á escolaridade

Dodro, 3 de novembro de 2010. A concellería de Igualdade e Benestar, dirixida pola tenente de alcalde nacionalista Victoria Rei, acaba de conceder as axudas para a escolaridade que se convocan a primeiros de curso desde que esta concelleira asumiu a responsabilidade desta área.

Este ano as beneficiadas foron 33 familias, cun total de 55 escolares (hai familias con máis de un/ha fillo/a), e baseándose en criterios económicos e sociais publicados previamente, cunha axuda máxima de 90 euros por cada menor escolarizado na educación obrigatoria. Os conceptos que se financian son material escolar e actividades extraescolares (do mesmo colexio).
A concelleira do BNG sinalou a súa satisfacción pola consolidación destas axudas que
se fan públicas cada ano a principios de curso, nas cales o concello inviste 3.270 euros.

Posted via email from Certo.gl, o xornal dixital de Barbanza e Noia

Ribeira: adxudicado o saneamento, abastecemento e pluviais da rúa do Pombal

A rúa Pombal é peonil, como a rúa de Galicia agora (na imaxen)

Ribeira, 3 de novembro de 2010. O Concello acaba de adxudicar á empresa Construcciones Anspal, S.L., unha actuación consistente no saneamento, abastecemento e pluviais da rúa do Pombal, situada na cidade Santa Uxía.

O importe da adxudicación ascende a 53.453,90 euros e o prazo de execución é de dous meses.

A rúa Pombal é unha vía peonil de elevada pendente que está situada xunto á rúa Romero Ortiz (a vía que sube dende a praza de Compostela).

As instalacións que dispón a día de hoxe son antigas, razón pola cal renovaranse as liñas existentes de abastecemento (instalando unha tubaxe de 50 metros de lonxitude e unha sección de 75 milímetros), saneamento (cunha tubaxe de 53 metros de longo e 250 milímetros de sección) e pluviais (tubaxe de 56 metros e 250 milímetro). Asímesmo, repoñerase a pavimentación con lousas de granito abuxardado.

Posted via email from Certo.gl, o xornal dixital de Barbanza e Noia

A Pobra do Caramiñal: os socialistas reclaman "as contas transparentes" de 2009 ao Concello

Download now or preview on posterous

SOLICITUDE INFORMES DE iNTERVENCIÓN.docx (47 KB)

A Pobra, 3 de novembro de 2010.- O Psoe municipal emitiu unha nota de prensa na que explican os motivos polos que reclaman menos opacidade nas contas ao goberno da Pobra, en mans do PP. Como acostumamos, a nota íntegra:

"Na Intervención do Concello, está o expediente relativo á Conta Xeral correspondente ó exercicio do ano 2009. O Concello ten que cumprir a obriga legal de render as contas que constitúen o mecanismo que pon de manifesto a xestión realizada e permite controlar o uso e destino dado aos fondos públicos, en definitiva é un mecanismo de control.

Unha vez máis o Alcalde - Presidente da Corporación pon atrancos para obter a información necesaria para o posterior debate en Pleno sobre a aprobación da conta xeral do ano 2009. O pasado mércores día 27 de outubro foron solicitados verbalmente na Intervención Municipal, e por escrito o día 29, os informes de reparo seguintes:

Informe sobre determinados incrementos salariais superiores ós legalmente previstos.
Informe sobre a aprobación de facturas. Omisión de procedemento de contratación por exceder o importe ou prazo de duración dos contratos menores. Ausencia de factura pola prestación do servizo.
Informe sobre a recadación de taxas por ocupación de dominio público. Inexistencia de liquidacións ou autoliquidacións xustificativas da recadación.

É evidente que a oposición está para fiscalizar ao goberno e parécenos gravísimo non ter acceso a esta documentación porque se supón que os incrementos salariais superiores aos previstos non os pagou o Alcalde coa súa nómina, nin ningún outro membro do equipo de goberno.

Igual de grave é a ausencia de facturas pola prestación de servizos, non ter acceso a esa documentación fai pensar na multitude de facturas que poidan estar nos caixóns agochadas, e si a persoa ou empresa que prestou o servizo non pasa esas facturas por rexistro corre o risco de non cobralas.

A inexistencia de liquidacións xustificativas sobre a recadación de taxas pola ocupación do dominio público, pódenos facer pensar o peor, da deriva que poidan ter eses cartos.

Todos estes temas son de gravidade extrema porque cos cartos públicos o Sr. Isaac debe ser exquisito e transparente.

En todo caso supoñendo que eses informes foran irrelevantes non tería inconveniente en facilitalos, desta maneira o único que nos queda que pensar, no mellor dos casos, é que se trate de chapuzas ou trapicheos administrativos, sempre de mal gusto, porque non hai mellor orgullo que ser transparente e honrado.

É imposible ter debate no Pleno si se nos censura a información, tendo en conta que todos eses informes son parte da conta xeral do 2009 e da necesidade de fiscalizar o uso correcto ou indebido dos fondos públicos.

O obxectivo é que se atendan as peticións da oposición, (claro está, si non hai que agochar), porque a conta que se aprobe nese Pleno procede dos impostos de tódolos pobrenses e non da economía familiar do Alcalde, (que esa soamente lle afecta a el).

Por outro lado recoñece publicamente que efectuar inversións cos fondos propios do concello é unha tarefa difícil. Recomendámolle que reduza os gastos en atencións protocolarias, en pompa e boato, porque con eses actos minguan as arcas municipais. Toda esa propaganda tan vistosa pagámola todos os pobrenses. Menos gastos improdutivos e máis eficiencia e racionalidade na xestión.

Este dispendio dos pasados días contrasta coas reclamacións dos proveedores, que como almas en pena, van cada día intentar cobrar o que se lles debe, e para eles non hai cartos. Esta si é a nosa preocupación, menos derroche e máis pagar ás persoas que prestaron servizos.

Reclamamos TRANSPARENCIA, e un concello que saiba os recursos económicos cos que conta, e a quen se lle debe. O concello da Pobra non é o “cortijo” do Alcalde".

Posted via email from Certo.gl, o xornal dixital de Barbanza e Noia

Boiro: Xuventudes Socialistas de Barbanza presenta este venres unha campaña contra a supresión do Noitebús

Un dos carteis da campaña anterior sobre o mesmo

Boiro, 3 de novembro de 2010. Este venres 5 de novembro presentarase en Boiro unha campaña de Xuventudes Socialistas do Barbanza para protestar pola futura supresión do servizo Noitebús.

Será na sede do PsdeG de Boiro, ás oito e media da tarde, e na presentación agárdase a María Torres, Secretaria Xeral das Xuventudes Socialistas de Galicia; Jorge Campaña, Coordinador Comarcal das Xuventudes Socialistas do Barbanza e Silvia Fraga, Portavoz de Igualdade e Mocidade do Grupo
Parlamentario Socialista. Os tres representantes socialistas ofrecerán a presentación da campaña “Habelas hainas” e explicarán as consecuencias e problemas para a sociedade galega en xeral e para a mocidade en concreto, que traerá consigo a retirada das subvencións a este servizo de mobilidade nocturna.

Na rolda de prensa, os integrantes das Xuventudes Socialistas e a representante parlamentaria tamén incidirán nunha análise das partidas orzamentarias que o Partido Popular adxudica ás políticas adicadas á mocidade.

Recollida de sinaturas

A maiores, o vindeiro sábado día seis de novembro, a partires das 23:30 horas, levarase a cabo unha recollida de sinaturas na rúa Pablo Iglesias de Boiro (no entorno da Praza da Mancomunidade, zona da movida boirense), tal e como se está realizando simultaneamente nos diversos municipios galegos. A finalidade é presentar unha moción no Parlamento en contra das medidas que se están tomando dende a
Xunta para eliminar o Noitebús.

Posted via email from Certo.gl, o xornal dixital de Barbanza e Noia

Noia: teatro e cinema, estrelas da programación cultural de novembro, xunto coa Semana Musical

A obra "Frantasmas" será representada o venres 5 de novembro

Noia, 3 de novembro de 2010. A programación cultural de novembro na vila noiesa estará marcada polas representacións teatrais e, xa na fronteira con decembro, coa nova edición da Mostra de Curtas "Vila de Noia", á que se presentaron máis de 400 producións de todo o mundo. Tamén cabe destacar o terceiro Congreso de Educación para a Saúde, que terá lugar na segunda fin de semana, do 12 ao 14 de novembro.

O programa previsto é o seguinte:

Día 5, venres

PRODUCCIONES A CONTRABUTACA representa a obra FRANTASMAS

22:00 h. Teatro “Coliseo Noela”

Vía Rede Cultural da Deputación

Día 6, sábado

NOIASCENA 2010

Teatro Candelexas de Noia

Obra: “faladoiro no banco”

21:00 h. Teatro “Coliseo Noela”