Boiro: un artesán de Cesar donou ao Concello a maqueta dun galeón que tardou seis meses en construír

O día da entrega do galeón estiveron presentes o Alcalde, Xosé Deira Triñanes, o Tenente de Alcalde, Juan Jesús Ares, o Concelleiro de Cultura, Xerardo Piñeiro, e o autor do barco, Santos Sieira Rodríguez, con algúns familiares

Boiro, 2 de agosto de 2010. O vestíbulo do Concello de Boiro acubilla dende hai uns días unha réplica dun galeón tallado en madeira, obra do veciño de Cesar (lugar de Boiro) Santos Sieira Rodríguez, quen obsequiou ao Concello con esta talla na que invertiu seis meses de traballo.

O galeón, bautizado co nome de María Rosa, é réplica dun galeón construído nun asteleiro de Ferrol, cidade á que viaxou este veciño para facerse cos planos do mesmo e poder así reproducilo a escala. Santos Sieira Rodríguez, carpinteiro de profesión aínda que na actualidade xubilado, é afeccionado desde rapaz á talla de barcos de distintas tipoloxías e tamaños, e leva feitos máis de medio cento deles, “aínda que este é o máis grande dos que fixen ata o de agora”, sinalou. Algúns destes buques forman parte dunha colección que posúe na súa casa, a modo de museo, e outros “funos regalando aos amigos”. Agora, acaba de doar ao Concello esta obra, o galeón María Rosa, feito con moito agarimo e bautizado con este nome na honra da súa muller, falecida hai uns meses. 

O Concello de Boiro agradece a Santos Sieira Rodríguez este obsequio, que permanecerá  no vestíbulo da Casa Consistorial para que tódolos veciños poidan ver e disfrutar a obra deste artesán.

Charla no CAB

MAÑÁ MARTES, DÍA 3 DE AGOSTO, ÁS 20.00 HORAS NO CENTRO ARQUEOLÓXICO DE NEIXÓN, terá lugar unha conferencia de Rafael Penedo Romero, arqueólogo da Dirección Xeral de Patrimonio Cultural, sobre a xestión do patrimonio arqueolóxico desde o punto de vista da Administración. Hoxe luns comezaron as escavacións nos castros, da man dun grupo de 25 persoas integrado por estudiantes e voluntarios.

Posted via email from Certo.gl, o xornal dixital de Barbanza e Noia