Ribeira: este xoves 28, Contacontos pola igualdade na escola municipal ás once da mañá

Imaxe da presentación. Foto: Deputación de Coruña
Ribeira, 27 de outubro de 2010. Este xoves 28, ás once da mañá na escola municipal, haberá unha sesión de contacontos dentro da campaña "Contacontos pola igualdade" que impulsa a Deputación de Coruña. Esta actividade roldará por oito concellos da provincia e Ribeira será a primeira parada e o único de Barbanza e Noia.

Os outros concellos no que se representará o contacontos son  Ames, Arteixo, Cambre, Carballo, Culleredo, Narón e Oleiros. 

O circuíto de actuacións foi dado a coñecer esta mañá pola deputada responsable da área de Igualdade da institución provincial coruñesa, Silvia Seixas, que destacou que con esta iniciativa a Deputación pretende contribuír a educar aos pequenos “nos valores do respecto, a tolerancia, e igualdade”.

Os contacontos representarán as tres obras da colección de Edicións Embora A igualdade conta, tituladas O pai dos mandóns, O segredo de Flora e A urna dos desexos, escritas por Cristina Justo e Paloma Rodríguez, dos que a Deputación da Coruña adquiriu 450 libros (150 exemplares de cada título) que serán distribuídos aos concellos e bibliotecas públicas da provincia para fomentar a igualdade de xénero entre os lectores máis novos.

Con esta acción, segundo explicou a deputada provincial, a Deputación pretende paliar “a eiva importante que existía no material de igualdade destinada aos nenos”. As obras están pensadas para cativos entre os 3 e os 10 anos de idade.

Posted via email from Certo.gl, o xornal dixital de Barbanza e Noia