Rianxo, 13 O grupo municipal do BNG de Rianxo diante do proceso de elaboración dos orzamentos municipais para o ano 2011 emitiu unha nota de prensa na que busca unha "achega de referentes xerais para o maior consenso posíbel na súa confección. Somos conscientes do estado actual de crise da facenda municipal e deste xeito non agardamos grandes investimentos, mais tampouco podemos compartir que se supriman servizos por exemplo, mentres mantemos luxos como o de manter en nómina un secretario persoal do alcalde ou negarse a facer concursos con publicidade e libre concorrencia de empresas e orzamentos ou se privatizan servizos como a actual volta a unha asistencia técnica de urbanismo por horas".
Non obstante, para o BNG "non é sacar adiante unhas pequenas actuacións concretas as que nos farán aprobar ou non os orzamentos, son outras cuestións globais sobre o xeito de xestionar. A experiencia inmediata de aplicar o rodillo e non incluír ningunha das propostas do BNG ao Plan de Obras da Deputación 2011 xa nos da unha idea por onde van ir os tiros do equipo de goberno".
O Bng adianta que só aprobará os orzamentos de Rianxo "se adoptan uns criterios básicos de planificación a medio e longo prazo, de transparencia na contratación e eficacia na xestión cotián do concello, de coherencia na política de investimentos, de priorizar gastos e de optimizar os equipamentos e persoal, entre outros".
As propostas do Bng son:
"Elaboración dunha Auditoría dos servizos básicos de alumado e dos gastos enerxéticos do concello de cara á renovación e necesaria unificación do mantemento do alumado nun só contrato en troques dos dous de hoxe en día, contrario a calquera principio de eficacia e xestión e de dubidosa xustificación, un feito que até os interventores teñen denunciado.
Plan plurianual de investimentos e auditoría xeral da rede de abastecemento de auga. O plan recollería as necesidades básicas de dotacións e servizos de abastecemento en todas as parroquias, un plano que establecería os obxectivos e o orzamento necesario a curto e medio prazo para que se vaian acometendo obras planificadamente. A interventora constatou xa no informe das contas que nin se sabe cal é a extensión total da rede de abastecemento, primeira medida no que atinxe a estes orzamentos. En tres anos non fixeron nada para corrixilo. A Xunta está a elaborar o estudo do saneamento así que faltaría esta pata: o abastecemento.
Compromiso de convocar unha Oferta Pública de Emprego de alomenos cinco persoas a convocar por oposición libre para saír ao paso da alarmante precariedade laboral deste concello, abrindo as perspectivas laborais da mocidade de Rianxo.
Adoptar dun regulamento de selección de persoal temporal e listas de agarda consensuadas no pleno e cos representantes dos traballadores que garanta os principios básicos e constitucionais de igualdade, mérito e capacidade, ademais do de publicidade.
Impulsar os concursos de obras con publicidade, sen abusar dos procedementos negociados e sen publicidade. Un millón a unha soa empresa levan adxudicados nestes últimos dous anos en tema de alumado e susbstitución de bombillas. Na práctica non existe a concorrencia.
Cubrir este ano a praza de Arquitecto/a Funcionario/a da Admón. Xeral. É preciso un equipo obxectivo e independente de traballadores municipais que dea a maior garantía aos veciños e veciñas, de calquera cor política.
Ingreso inmediato na Axencia Galega de Protección da Legalidade Urbanística.
Creación do Patrimonio Municipal do Solo, previsto nas Leis e dotado con todos os ingresos procedentes das cesións obrigatorias de chan ou o seu equivalente económico. Este patrimonio destinarase a crear Vivenda de Protección Oficial. Hoxe seguimos carecendo dun inventario actualizado de bens do Concello, sendo a data de referencia 31/12/1992, o que nos deixa nunha situación de descoñecemento a día de hoxe, dezaoito anos despois, dos bens municipais reais do Concello de Rianxo.
Plan de amaños dos centros escolares e parques infantís. Entre elas o repintado do Colexio Público de Taragoña e o cambio de zona de xogos de Asados.
Adopción dun regulamento de participación cidadá. Este regulamento, que será remitido a todas as casas incluirá a información necesaria para que todos e todas coñezamos os nosos dereitos como cidadáns para intervir nos asuntos públicos. Entre outros terá como elementos básicos garantir a participación veciñal nos plenos para intervir nas cuestións e temas da súa competencia.
Optimizar os locais públicos dispoñíbeis, cunha dotación de persoal suficiente para atendelos, en troques de realizar novos investimentos que xeralizan a desatención. O Auditorio infrautilizado por falta de persoal de conserxería polas tardes, o Museo do Mar pechado nos fins de semana, etc... A Biblioteca pechando cando colle vacacións a bibliotecaria, así todos os equipamentos.
Crear un comisión coa participación dos grupos políticos que impulse e fiscalice a participación do concello en insitucións e entidades supramunicipais: DELOA, Grupos Acción Costeira, Mancomunidade, nestes momentos baixo o único control do Alcalde".
Posted via email from Certo.gl, o xornal dixital de Barbanza e Noia
No hay comentarios:
Publicar un comentario