A Pobra do Caramiñal: o Concello modificará instalacións en varios edificios para aforrar enerxía

A Pobra do Caramiñal, 8 de febreiro de 2011. O Concello da Pobra do Caramiñal levou a cabo un estudo nos edificios municipais para poder levar a cabo a instalación de equipamentos que axuden a aforrar enerxía nos mesmos. Nestes días estanse a instalar nos edificios do Concello unha serie detectores e lámpadas de baixo consumo. 

Por unha banda estanse a instalar detectores de presencia (para que as luces se acendan só cando se precise, ao activarse co movemento) en corredores, baños, vestíbulos e escaleiras sobre todo. Por outra, estanse a substituir as obsoletas lámpadas incandescentes -só quedan 45 nos edificios dependentes do Concello- por lámpadas fluorescentes compactas.

Tamén se traballa na substitución dos tubos fluorescentes actuais, que sobrepasan o milleiro, por outros de mellor eficiencia enerxética. A maiores, nos radiadores colócanse válvulas termostáticas, de xeito que só traballen cando a temperatura baixe a determinado nivel ou segundo se programen. Vanse instalar 211 válvulas.

No mercado municipal instalarase unha batería de condensadores e no polideportivo Venecia irán placas solares de tipo térmico (8 metros cadrados de paneis para acadar os 8 quilovatios, co que se cubrirían as necesidades totais de auga quente neste pavillón.

Estas melloras estanse a facer na Casa do Concello, nas oficinas da policía municipal, no mercado, no polideportivo Venecia, no ceip Salustiano Rey e no ceip Fernández Varela. Investiranse máis de 45.000 euros para "conseguir un aforro enerxético de acordo cos novos regulamentos", explicaron dende o Concello.

Posted via email from Certo.gl, o xornal dixital de Barbanza e Noia