Ribeira: modifican o horario de recollida do lixo en Noiteboa e Nadal e abren ao tráfico a rúa Cristóbal Colón

Ribeira, 22 de decembro de 2011- A empresa concesionaria do servizo municipal de limpeza, Urbaser, comunica que os vindeiros días sábado 24 e sábado 31 de decembro, con motivo da celebración da Noiteboa e Nadal, o horario de recollida de lixo na cidade de Santa Uxía de Ribeira terá lugar entre as 14 e as 19 horas. 

Doutra banda, o Punto Limpo permanecerá pechado nas tardes dos dous días indicados.

Apertura provisional de Cristóbal Colón ata pasados os Reis

Por outra banda,  o Concello informa de que a rúa Cristóbal Colón, actualmente en obras, vai abrir de xeito provisional ao tráfico rodado durante as festas de Nadal. 

No día de hoxe está  previsto proceder ao aglomerado da zona de rodadura da vía, estendendo a primeira das dúas capas previstas sobre a mesma. Así e logo, está previsto que mañá venres 23 de decembro, ás 14 horas, poida abrir a rúa á circulación de vehículos. 

Cómpre advertir de que, dado que aínda quedará por estender unha segunda capa, tanto as baixadas aos pasos de peóns como os accesos aos garaxes quedarán a un nivel algo superior ao da zona de rodadura, á espera precisamente de volver a aglomerar. 

Esta última actuación (a extensión da segunda capa de rodadura) terá lugar pasados os Reis, na semana do 9 ao 16 de xaneiro, na que será preciso volver a cortar a vía durante dous días para acometer o traballo. 

Entrementres, os operarios investirán as festas de Nadal en realizar distintos labores sobre as beirarrúas.

Posted via email from Certo.gl, o xornal dixital de Barbanza e Noia