Ribeira: ata o 8 de xuño poderase ver no IES Leliadoura a nova exposición sobre "O Principiño"

• Non é a mesma de abril: contén traballos elaborados no centro

Ribeira, 21 de maio de 2012. Como remate das actividades iniciadas a finais de abril e que tiveron como centro a semana cultural desenvolvida arredor das Letras Galegas, o IES Leliadoura vai organizar, en colaboracións coas EEI da Pobra do Caramiñal, Vilariño e Fernández Varela, unha exposición sobre "O principiño".

Como xa tiveron ocasión de apreciar coa exposición da Fundación Carlos Casares (feita en abril) "O principiño" foi traducido a máis de 180 linguas e dialectos. Isto mostra o grande interese espertado pola obra de Saint- Exupéry, en aparencia infantil, pero chea de fondas reflexións éticas e filosóficas e impregnada dun profundo alento poético.

 

Con esta exposición pretenden "renderlle unha homenaxe ao pequeno príncipe e ao seu mundo. El serviunos de inspiración e alento para dar saída á creatividade e a imaxinación non só de alumnado deste centro, senón dos nenos e nenas das Escolas de Educación Infantil de Pobra do Caramiñal, e, como non, tamén do profesorado", explican dende a dirección do Leliadoura.

A inauguración da exposición, este luns 21 ás 11:30 da mañán na aula de audiovisuais do IES Leliadoura, fíxose cunha lectura en diferentes linguas de parágrafos da novela e a proxección multimedia simultánea que a acompañará con imaxes e sons relacionadas coa novela de Saint Exupery.  Alumnos e profesores do Leliadoura leron nas seguintes linguas: castelán, romano, francés, inglés, chinés, árabe, latín, italiano e galego.

 

Con esta lectura multilingüe inauguraron esta mostra que contén traballos diversos :

 

• "O principiño ilustrado", realizado polo alumnado de Educación Plástica e Visual do IES Leliadoura.

• Escenografía para curtas de animación

• O traballo titulado "Isto non é un sombreiro" , ilustracións inspiradas no primeiro capítulo da obra, realizado tamén polo alumnado de Educación Plástica e Visual.

• Escenografía e atrezzo de personaxes de "O Principiño", elaborado por alumnos/as de 4º de Diversificación.

• Galería de planetas e estrelas, dos alumnos de Educación Infantil.

• Exposición bibliográfica da obra en 20 linguas distintas, libros pertencentes a unha colección particular.

A exposición vaise clausurar o día 8 de xuño e poderáse visitar por parte de todo tipo de público en horario lectivo do centro: de luns a venres de 9:00 a 13:40 horas e luns e mércores de 16:00 a 18:30.

Posted via email from Certo.gl, o xornal dixital de Barbanza e Noia