Mar: o PSdeG leva ao Parlamento as gaiolas de salmón de Muros e pide que se avalíe o seu impacto

3 PNC gaiolas salmon ria muros 010213 JRVAL 090002894.pdf Download this file

 

• O portavoz de Pesca do Grupo Socialista, José Ramón Val, presenta mañá na Comisión de Pesca do Parlamento de Galicia unha Proposición non de Lei “sobre as actuacións que debe levar a cabo o Goberno galego en relación co impacto do proxecto de implantación de gaiolas para a cría de salmón na ría de Muros”.
• A iniciativa será debatida e votada na Comisión de Pesca que comeza ás 16,30 h. da tarde
  
• Como se observa no texto da iniciativa, os socialistas inda non falan dos moluscos invasores que presuntamente chegaron con esas gaiolas

Relacionadas:

• Mar: o GEMM alerta de moluscos invasores nas augas de Arousa

• Mar: eramos poucos e chega o mexillón pigmeo de N. Zelandia

 

Posted via email from Certo.gl, o xornal dixital de Barbanza e Noia

Rianxo: o colexio Castelao, único gañador a nivel Galicia do certame da Xunta de exposicións sobre Roberto Vidal Bolaño

• Recibirá 2.500 euros polo proxecto de exposición "Autor, actor e público do aquí"
• A mostra dos nenos e profesores de Rianxo vai ser imprimida e distribuída en máis de 1.600 puntos de Galicia e do exterior, tales como centros de ensino, centros de estudos galegos, centros da emigración, bibliotecas municipais e casas da cultura, entre outros. Nela figurarán a imaxe gráfica da Xunta de Galicia e o nome do centro gañador.

• Os obxectivos deste certame de creación de mostras sobre Vidal Bolaño, autor homenaxeado este ano coas Letras Galegas, son os seguintes: 
  

1. Potenciar o estudo da obra e da época de Roberto Vidal Bolaño.
2. Propiciar a reflexión sociolingüística sobre esta etapa histórica.
3. Fomentar a valoración das contribucións individuais e colectivas na dignificación e normalización da lingua galega.
4. Impulsar a realización de actividades que fomenten a colaboración interdepartamental e que potencien a implicación activa do profesorado e do alumnado.
5. Fomentar e difundir unha visión persoal por parte da comunidade educativa sobre a figura deste autor.
6. Enriquecer a oferta de materiais existentes en lingua galega e promover a súa divulgación como referentes para outros centros.
   

• As outras categorías deste certame quedaron desertos, ao parecer pola baixa calidade dos traballos presentados

O colexio Castelao tenlle collida a medida xa aos premios da Xunta: o ano pasado gañou o das Letras Galegas 2012 cun traballo sobre Paz Andrade

Posted via email from Certo.gl, o xornal dixital de Barbanza e Noia

Ribeira: este venres 8, 40 candidatos a 17 premios na VIII Gala do Deporte

• Tres mencións especiais: a Moncho Sampedro e, xa a título póstumo, a Mariscal e Miguel Rodríguez

Ribeira, 6 de marzo de 2013.- O concelleiro de Deportes Juan Luis Martínez Queiruga deu hoxe algunhas pinceladas do que será a VIII Gala do Deporte, pero tamén quixo reservarse certas sorpresas, principalmente a identidade dos 17 gañadores e gañadoras deste certame que se celebrará ás 20 horas do venres no Auditorio Municipal.

Segundo informou o edil, este ano presentáronse 40 candidaturas para un total 17 galardóns: un máis que o ano pasado, xa que ás 16 categorías xa existentes se engade un novo premio para distinguir o mellor labor investigador.

O que si desvelou Martínez Queiruga foi o nome das tres mencións especiais que se entregarán no evento. Unha delas terá por destinatario a Moncho Sampedro, especialista en sendeirismo pertencente á Asociación As Miñoteiras; mentres que as outras dúas se concederán a título póstumo a José Manuel Pérez Sampedro, ‘Mariscal’ (persoa moi ligada ao deporte local, especialmente a través das funcións que exerceu no Atlético Riveira) e a Miguel Rodríguez, Miguel do Áncora, quen fora fundador da liga de fútbol sala en 1976.

Sobre o evento, o concelleiro manifestou que durará  entre 80 e 90 minutos e estará dividido en cinco bloques. Tamén avanzou que no seu transcurso actuará un humorista monologuista.

A entrada é libre e gratuíta. Os interesados en asistir poderán retirar as súas entradas ás 19.30 horas, é  dicir, media hora antes do inicio da gala.

Cada premiado recibirá un galardón consistente nunha réplica do León de Padín obra do artista local Jontxu Argibay.

As 17 categorías son:

1. Mellor Deportista feminina discapacitada

1. Mellor deportista masculino discapacitado

1. Mellor xuíz / árbitro

1. Galardón especial ao labor investigador

1. Patrocinio deportivo

1. Deportista revelación masculino (sub 18)

1. Deportista revelación feminina (sub 18)

1. Mellor equipo masculino

1. Mellor equipo feminino

1. Mellor deportista feminino

1. Mellor deportista masculino

1. Mellor Club local

1. Mellor entidade na promoción do deporte base e do deporte para todos

1. Mellor labor informativa

1. Mellor evento deportivo

1. Mellor adestrador

1. Mellor club educativo na promoción do deporte escolar

E ao día seguinte:

• Ribeira: María Vilas e as do Natural Sport, homenaxeadas na Gala do Deporte Feminino en Ames
  

Posted via email from Certo.gl, o xornal dixital de Barbanza e Noia

Dodro: presentado o protocolo contra a violencia de xénero

Dodro, 6 de marzo de 2013. Onte, no Salón de Plenos do Concello, presentouse o Protocolo Municipal contra a violencia de xénero coa presenza da Secretaria xeral da igualdade, Susana López Abella, os alcaldes e as concelleiras das áreas de Igualdade dos concellos de Padrón e Rois.

No acto tamén estiveron presentes o persoal que colaborou na elaboración de este protocolo, persoal técnico implicado no tratamento e atención ás vítimas, da sanidade, da seguridade do estado, de protección civil, da administración de xustiza, dos centros educativos e dos servizos sociais do Concello. 

Abriu o acto a Concelleira de Servizos Sociais e Igualdade, Marisol Boga Grela, que reivindicou os dereitos das mulleres recordando que hai que seguir avanzando para conseguir a igualdade entre homes e mulleres e erradicar a discriminación e a violencia de xénero. Enumerou os programas específicos que o Concello leva a cabo ao longo do ano dirixidos á educación en valores, conciliación e formación, prevención e sensibilización da violencia de xénero.

Presentou o protocolo como “unha ferramenta moi importante para dar unha resposta eficaz ante casos de violencia machista”, rematando que o concello ten a intención de seguir traballando nesta liña para que algún día por fin se acaden estes obxectivos.

A Secretaria xeral de Igualdade na súa intervención alabou a iniciativa  do concello coa elaboración do protocolo, animándoo a traballar nesta liña e recalcou a necesidade de seguir colaborando para lograr unha sociedade de benestar onde non teña cabida a violencia de xénero. Pechou o acto o alcalde de Dodro, Valentin Alfonsín Somoza, quen agradeceu o bo traballo a todas as persoas que colaboraron na elaboración do protocolo.

Destacou que con este protocolo a mensaxe é que “estamos preparados e coordinados para enfrontarnos a quen exerce a Violencia contra as mulleres”, que contra a violencia de xénero " a permisividade debe ser cero e contundencia máxima e que cada caso de violencia de xénero é un fracaso da nosa sociedade".

Relacionada:

• Dodro: o 5 e o 8 de marzo, actos polo Día da Muller

Posted via email from Certo.gl, o xornal dixital de Barbanza e Noia

Ribeira: a nadadora María Vilas e as rapazas do club de Taekwondo Natural Sport, homenaxeadas este sábado na Gala Feminina do Deporte Galego

O equipo feminino do club Natural Sport e a nadadora local María Vilas foron distinguidas pola asociación de Mulleres Deportistas Galegas (MUDEGA) e recibirán os seus correspondentes galardóns nunha gala organizada para o sábado 9 de marzo no municipio de Ames.

Así o decidiu o xurado do certame en reunión celebrada o pasado venres, que valorou os méritos acadados tanto por María Vilas (campioa de Europa júnior en 800 metros libres, subcampioa de 400 estilos e bronce europeo en 1500 libres) como polo equipo de taekwondo (subcampión de Europa de Clubs e campión de España).

Os do municipio acudirán a unha gala na que tamén serán premiados outras grandes deportistas da Comunidade Autónoma, como as medallistas olímpicas Tamara Echegoyen, Sofía Toro e Begona Fernández ou a xogadora de balonmán Begoña Fernández. Así mesmo, recoñecerase o labor, entre outros, do adestrador da selección galega de rugby Rogelio Sabio ou da xuíza de atletismo internacional Dolores Rojas.

No transcurso da gala, MUDEGA tamén realizará unha mención especial para as xogadoras do club Karbo de fútbol de A Coruña, que lograron cinco campionatos estatais e foron a base da primeira selección galega feminina, campioa de España no primeiro campionato estatal de seleccións territoriais.

Gala de Ribeira, este venres 8

Por outra parte, cabe recordar que tamén o Concello de Riveira está inmerso nos preparativos da súa propia Gala do Deporte, que terá lugar o próximo venres 8 de marzo. Nos próximos días darase conta dos candidatos a recibir as distincións nesta oitava edición.

folleto_mudega_gala.pdf Download this file

Posted via email from Certo.gl, o xornal dixital de Barbanza e Noia

Ribeira: o Concello quere poñerlle máis doado á veciñanza o pago de tributos municipais

• Reforma a cobranza de tributos para que os cidadáns paguen directamente nas entidades financieiras
• Vaise aplicar de xeito progresivo: en primeiro lugar no imposto de vehículos
  

Ribeira, 5 de marzo de 2013.- O Concello vai poñer en práctica este mesmo mes un proxecto que ten por obxecto ofrecer ao cidadán un mellor servizo e unha maior comodidade á hora de abonar os seus tributos municipais no suposto de que os recibos non estean domiciliados. Así, os contribuíntes xa non terán que pasar polas oficinas de recadación do Consistorio para afrontar estes pagos (coas consabidas ringleiras que isto adoita supoñer), senón que deberán formalizalos en calquera das entidades financeiras colaboradoras que teñen á súa disposición repartidas xeograficamente polo municipio.

Esta experiencia piloto vaise aplicar en primeiro lugar no Imposto sobre Vehículos de Tracción Mecánica (IVTM) e, no caso de constatarse a eficacia da iniciativa, ampliarase posteriormente a outros tributos. Outras Administracións xa puxeron en práctica accións desta índole, como a Deputación de A Coruña co Imposto de Bens Inmobles (IBI).

Período voluntario

Hai que recordar que o período de pagamento voluntario do IVTM abarca ente o 15 de marzo e o 15 de maio. Unha vez lle chegue ao domicilio de cada contribuínte o recibo correspondente (se non o recibise poderá obtelo na Tesourería Municipal a partir do 15 de abril) o cidadán vai ter á súa disposición tres posibles vías de liquidar este imposto:

• Pagándoo nas entidades financeiras colaboradoras no horario de caixa de cada entidade,

• Sufragándoo nos caixeiros das entidades sempre que dispoñan do servizo de pago de recibos con código de barras

• A través de Internet, para o cal a páxina web do Concello (wwww.riveira.es) enlazará coas pasarelas de pagamento electrónico das distintas entidades.

As entidades financeiras colaboradoras son: BBVA, NCG Banco, Banesto, Banco Pastor, Banco Popular, Banco Gallego e Caixa-Bank-La Caixa.

Se denuncian horarios para pagar facturas en bancos Otro abuso de la banca permitido por el gobiernoeconomia.elpais.com/economia/2013/… vía @el_pais

— UCE-Asturias (@UCEAsturias) March 2, 2013

Posted via email from Certo.gl, o xornal dixital de Barbanza e Noia

Porto do Son: ata o 19 de abril para presentar imaxes ao certame fotográfico sobre igualdade de xénero

Concello de PORTO DO SON_triptico fotos IGUALDADE.pdf Download this file

• Máis de mil euros en metálico para premios
• Valorarase a vinculación das fotos con xentes ou lugares de Porto do Son
  

Bases e características no tríptico:

Posted via email from Certo.gl, o xornal dixital de Barbanza e Noia

Ribeira: o Sálvora adica o partido deste domingo, 10 de marzo, a recadar fondos para a Cofradía da Dorna

Imaxe do día da inauguración do local da Cofradía da Dorna

O vindeiro Domingo 10 de Marzo a partir das 17:00 horas celebrase no Campo Municipal Sintético de A Fieiteira o partido do Grupo 5 de Segunda Autonómica entre o Sálvora CF e o CD Sar.

A directiva do Sálvora CF (club ribeirense e colíder neste intre da competición), tomou a decisión de que todo o que se recade no encontro (venta de entradas e rifas) será destinado á Real e Ilustre Cofradía Da Dorna.

Esta iniciativa do club está motivada "porque consideramos que un club coma o noso debe colaborar naqueles acontecementos e entidades que fan que Ribeira sexa coñecida a nivel galego e nacional, e que mellor acto que colaborar dentro das nosas posibilidades coa Festa da Dorna, que ano tras ano trae a milleiros de persoas ao noso concello no mes de xullo e fai que o nome de Ribeira traspase fronteiras. E xa non só pola propia organización da Festa senón por todas aquelas actividades culturais e deportivas nas que a asociación está presente, sempre velando polos intereses dos nosos veciños", explica a directiva.

Sinalan tamén que é "unha pequena maneira de apoio que desde este pequeno e humilde club do concello podemos ofrecer para colaborar con esta entidade que xa leva “LXIV singladuras” facendo a Festa e que este ano chega os 65 anos máis viva e forte que nunca e que necesita o apoio de todos para que a nova singladura, en anos tan difíciles economicamente, sexa un éxito".

Esta campaña benéfica de recadación da taquilla do Sálvora para a Real e Ilustre Cofradía da Dorna enmárcase "dentro da responsabilidade social que coma club de Ribeira, con máis  de 150 nenos na súa nómina e cunha ampla masa social e de aficionados, ten o deber de colaborar con aqueles entidades que buscan o desenvolvemento de Ribeira e súmase a outras iniciativas como a Campaña de apoio a Cáritas, ou a realizada cando se quixo recortar a cota do lirio e na que desde esta entidade estivo colaborando con pancartas e brazaletes nos partidos que as súas diferentes categorías xogaban", lembran tamén dende a directiva.

A roda de prensa de presentación desta campaña será  o vindeiro xoves 7 de Marzo ás 19:30 horas no Local da Real e Ilustre Cofradía da Dorna sito no baixo do Palco de Pedra do Malecón.

Posted via email from Certo.gl, o xornal dixital de Barbanza e Noia

Ribeira: o Concello copia ao de Lousame e homenaxea ás leiteiras o Día da Muller Traballadora

Estatua da leiteira en Ourense

Ribeira, 5 de marzo de 2013.- Con motivo da conmemoración este 8 de Marzo do Día Internacional da Muller Traballadora, o Concello decidiu homenaxear ao colectivo de leiteiras do municipio. Igualiño que o de Lousame, que fará o acto o vindeiro domingo, como xa anunciamos.

Con tal motivo, o Concello está a preparar un acto que se desenvolverá  o propio venres ao mediodía no salón de plenos do Consistorio e no que se prevé contar cunha presenza multitudinaria de mulleres que no termo municipal riveirense se dedicaron a este oficio hoxe practicamente desaparecido. Estímase que serán máis de 70 o número de profesionais reunidas, cada unha das cales recibirá un diploma conmemorativo e unha flor. Ademais, está previsto que á máis veterana das asistentes se lle faga entrega do obsequio institucional consistente no faro de Corrubedo en cerámica de Sargadelos.

Será o propio alcalde Manuel Ruíz Rivas o que presida este acto, no que participará tamén entre outros a concelleira de Xuventude e Igualdade, Aroa Fernández Cadórniga.

Dende o Conservatorio Profesional de Música de Ribeira amenizarase o acto coa representación dunhas pezas de saxo. Será un cuarteto integrado por tres alumnos da Aula Galega de Saxofón, un seminario do conservatorio que se leva a cabo durante todo o ano.

Dende fai máis de dez anos, no Día da Muller Traballadora a Oficina de Igualdade do Concello de Ribeira en colaboración coa Asociación de Amas de Casa organizan para esta data un acto no que se homenaxea a un colectivo de mulleres cun oficio ou profesión determinado.

Noutros concellos:

• Lousame: o Concello homenaxea ás leiteiras no Día da Muller

  
  

• Dodro: o 5 e o 8 de marzo, actos polo Día da Muller

• Noia: este venres 8, polo Día da Muller, Performance e manifesto

Posted via email from Certo.gl, o xornal dixital de Barbanza e Noia

Ribeira: o Museo Municipal conta xa co sextante de Silverio Sobrido

A Sala Museo Municipal de Ribeira acolleu onte a entrega en  réxime de depósito dun instrumento náutico que pasa a integrarse nos fondos da colección permanente desta instalación cultural.

Trátase dun sextante de mediados do século XX que Silverio Sobrido Álvarez cede no nome da súa familia para contribuír así a que os veciños e visitantes do museo teñan un mellor coñecemento de como era o oficio do mar antes da navegación por satélite. O alcalde de Ribeira, Manuel Ruiz, recibiu esta entrega nun acto que contou tamén coa intervención da directora da sala, Pilar Casas, e da concelleira de Cultura, Elvira Pisos.

Segundo relatou Silverio Sobrido, a peza foi mercada en Irlanda polo seu pai, de igual nome que o fillo, no ano 1947. De profesión patrón de altura, o proxenitor –quen durante 14 anos desempeñou o cargo de patrón maior da confraría de Riveira- empregou este instrumento de medición en caladoiros como o Gran Sol ou Terranova. A través do sextante conseguíanse mediante cálculos astronómicos latitudes e lonxitudes que se plasmaban nas cartas náuticas e así era posible guiarse na navegación.

O alcalde Manuel Ruíz agradeceu a doazón e a xenerosidade por parte da familia de Silverio Sobrido ao pobo de Ribeira e subliñou a importancia que ten esta doazón para o Museo, pois permite que a instalación se siga nutrindo de pezas que para os homes do mar teñen un importante significado. “A moitos dos nosos mariñeiros evocaranlle outras épocas que afortunadamente non teñen nada que ver coas actuais”, resaltou o rexedor municipal.

See the full gallery on Posterous

Posted via email from Certo.gl, o xornal dixital de Barbanza e Noia