Ribeira, 12 de xaneiro de 2011. A delegación da Xunta de Galicia en Madrid acolleu onte a inauguración da mostra "Arousa", do artista de Ribeira Antonio Pérez, a primeira do ano. O acto correu a cargo do coordinador de Actividades Culturais, Ramón Jiménez, quen recordou nas súas palabras como o autor naceu no seo dunha familia mariñeira e xa dende pequeno traballou co seu pai nunha dorna aprendendo distintas artes de pesca. Daí lle vén a súa paixón polo mar. Aos 24 anos, convertido xa en capitán de pesca pola Escola Náutica de Vigo, partiría cara aos mares de Sudáfrica a exercer o seu oficio durante unha década. "Actualmente", dixo Jiménez, "é mariñeiro en terra. Mariñeiro reconvertido en profesor de pintura e debuxo en Ribeira, que recolle nos seus cadros o froito de tantos anos de navegación, eses peixes que durante tanto tempo flotaran na súa retina, tan familiares para el, e que agora, transformados en pintura, inmortaliza nas mans dos seus queridos paisanos da Ría de Arousa, mans traballadoras que os descargan dos racús e os limpan, e que cosen tamén as redes onde se mexesen na súa postremeira loita co seu destino. As persoas ás cales pertencen estas mans desprázanse por estes cadros como nun Belén vivente e, ao igual que as figuras dos nacementos de Nadal, resultan entrañables. Parece que puidésemos coa nosa mirada convertelas en terracota e, sacándoas dun cadro, colocalas noutro". Destacou tamén o coordinador, a sensación de "paz que trasmiten os personaxes e as escenas que habitan os cadros, que provén quizais ou polo menos en parte do contraste coa dura batalla que libran os mariñeiros contra o proceloso mar... "
Pola súa banda o artista, tras agradecer á Casa "a cálida acollida que nela me dispensaron", explicou a cantos asistiron ao acto que é unha homenaxe a Arousa, "o lugar onde nacín e a ría máis bonita do mundo, aínda que non coñezo todas!, pero sen dúbida é moi bonita". O autor dixo que os cadros "son como anacos de quen os realiza" e no seu caso, explicou, que aínda que lle gustan moito as paisaxes, o protagonismo téñeno sempre as figuras, que reflicten unha calidez que contrasta coa dureza da profesión. Na súa paleta predominan os azuis e os terras, coa súa ampla variedade cromática, e traballa tamén coas texturas, segundo a temática que trata e o efecto que desexe conseguir.
A exposición de Antonio Pérez estará aberta ata o 29 de xaneiro.
Posted via email from Certo.gl, o xornal dixital de Barbanza e Noia
No hay comentarios:
Publicar un comentario