A asociación do balandro Joaquín Vieta tamén pediu no seu día manter a escolleira
Noia, 22 de Nadal de 2011. O colectivo Escollera, que defende a mantenza da barreira de coídos que hai na Ría de Noia, emitiu unha nota de prensa ante os últimos anuncios e contra-anuncios feitos polas distintas administracións. Como é habitual en Certo, colocámola enteira:
"Diante do que está a acontecer, logo do último acordo do Consello de Ministros, coa pretensión do Sr. Alcalde de Noia co apoio do seu partido de pretender levar por diante a metade de fora da escollera do acceso ao porto de Noia, o que faría que de xeito irreversible Noia quedara sen o seu porto, dende este colectivo queremos poñer en coñecemento da opinión pública a proposta de concordia que estivemos a desenvolver nos últimos meses, denunciar a gravidade da actuación do Ministerio de Medio Ambiente tanto dende o punto de vista de deixar definitivamente a Noia sen porto como tamén de vir a ocasionar importantísimos danos no espazo marisqueiro produtivo actual sen que iso signifique ampliación algunha do mesmo.
Tanto o Partido Popular como o Bng concorreron as últimas eleccións cunha proposta para este ámbito que vemos reflectida na moción, deles esperamos que cumpran co compromiso adquirido cos noieses e se sumen a esta moción, do contrario a súa actuación sería merecedora de todo tipo de desagradables calificativos. Da forza política N.O.I.A esperamos tamén o seu apoio aínda que eles nunca nada dixeron ao respecto, do psoe sabemos que nada podemos esperar pois nin sequera quixeron recibir a este colectivo.
Vai ser un momento clave para que cada un se defina, e insistimos en que aí veremos se alguén estivo a enganar a Noia.
Xuntamos a proposta de moción que se entregou a todas as forzas políticas, aberta a melloras esperando o seu apoio.
BORRADOR TEXTO PROPOSTA DO COLECTIVO ESCOLLEIRA SOBRE O PORTO DE NOIA, RECUPERACIÓN ESPAZOS PRODUCTIVOS, PRAIA LABARTA E PASEO MARÍTIMO
Para que ao abeiro do establecido no artigo 21.2 do Regulamento Orgánico do Concello de Noia, os grupos municipais que teñan a ben apoiala a tramiten como moción.
O pasado 25 de xuño do ano 2010, o pleno do concello de Noia aprobou unha moción referida en parte o mesmo ámbito, en base a ela , os compromisos adquiridos por determinados partidos políticos de forma clara nas pasadas eleccións municipais, a necesidade que ten o conxunto da cidadanía de que ese espazo público sexa un verdadeiro revulsivo para o desenvolvemento económico da comarca e a oportunidade que se abre coa coincidencia de gobernos na Xunta de Galicia e no Estado, elaboramos a seguinte proposta:
M O C I Ó N
Exposición de motivos:
Que, cunha sinxela revisión das diferentes hemerotecas calquera cidadán pode observar cal foi a evolución da produción marisqueira desta ría, a historia pasaron as fileiras de camións cargados de marisco, as toneladas e toneladas de berberecho de altísima calidade e ameixa, a historia non tardará a pasar de forma definitiva a importancia que para a vida das xentes da comarca tiña o marisco de Noia, cantos problemas solucionou na maioría das familias que o extraían directamente e para outras que tamén vivían del de xeito indirecto.
O porqué se estivo a renunciar paulatinamente nas últimas décadas a todo iso, a natural e acelerada colmatación a desidia e renuncia de toda unha vila a defender o propio, mesmo podería dar lugar a varias teses de cómo un pobo asume o seu declive de xeito incomprensible, da crise que estamos a pasar poderíamos extraer moitas conclusións, para o caso bastaría unha sola, non podemos renunciar o noso potencial e nos mesmo debemos ser os que loitemos por él, esta ría ten capacidade dabondo para ser o motor desta comarca e debemos demandar das administracións públicas unha actuación decidida para recuperar as ( 293 has) de espazo con potencialidade de recuperación para a produción marisqueira, a afrontar así o futuro dando pasos decididos na mellora e adecuación dos prantexamentos de xestión conforme demanda os tempos nos que vivimos, cultivar en toda a extensión da palabra, recuperar espazos produtivos que pasa inescusablemente por axudar a natureza retirando de forma mecánica a lama, mellorar a comercialización son actuacións que o conxunto dos cidadáns deben demandar.
Por outra banda as potencialidades e usos que a ría ten abranguen a outros sectores que tamén poden ser xeradores de moito emprego e abrir así mesmo portas para o futuro, reiteramos de novo a exposición do texto aprobado polo concello fai máis de un ano por ser de plena actualidade, referido o porto .
A importancia histórica do porto de Noia ven desde a súa fundación polo Rei Fernando II, no ano 1168 como porto de Compostela, coidando que a estas alturas ninguén lle negará a esta vila a súa historia como porto receptor de numerosos peregrinos que viñan por mar para continuar logo ata Santiago de Compostela, nin a súa enorme importancia comercial que mesmo o levou a ser un dos portos máis importantes de Galicia, xunto co de Pontevedra.
A súas condicións naturais propiciaron todo o anterior, pero tamén foi a mesma natureza co progresivo depósito de lama no fondo da ría, a que fixo desde séculos que o porto fora perdendo pouco a pouco o seu calado.
Esta situación, e diante da demanda de diversas entidades de Noia, levou a que xa no ano 1952, D. Eduardo Álvarez Valderrama redactara un primeiro proxecto que pretendía a formación dunha canle duns 1500 metros de lonxitude cunha anchura de 60 metros e con un calado de 1,60 metros por debaixo da baixa mar viva equinocial, proxecto que na súa redacción definitiva permitía o acceso a Noia de barcos desde un calado de 3,60 metros e 1.300 toneladas de desprazamento que poderían entrar todos os días, ata barcos de 4,41 metros de calado medio e 2.600 toneladas de desprazamento que poderían entrar coa marea viva mensual. Este proxecto que mesmo algúns con enorme ousadía se atreveron a cualificar de inviable tecnicamente, MESMO RECIBEU FELICITACIÓNS DA SUPERIORIDADE pola súa orixinalidade, xa que entre outros importantes aspectos e mediante un estanque de cabeceira, conseguía manter o calado da canle de acceso de forma natural.
Hai todo un traballo realizado que analiza aspectos técnicos e económicos, entre outros, que insiste continuamente na proximidade a Santiago de Compostela e na importancia que ese feito ten para o porto de Noia, e que nel tamén poden ver que a falta dunha consignación económica que ascendía a 5.332.023,01 de pesetas, levou a colmatación da enseada de Noia ao punto no que hoxe está.
A revisión en profundidade do proxecto do Sr Álvarez Valderrama amosa a enorme visión que este home tivo para Noia, logo da construción da ponte, toda a escolleira e cando él fixo, con lixeiros matices, é válido para o século XXI, máxime coas novas comunicacións que esta vila ten con Santiago, co seu aeroporto que fai que Noia poida ser o porto non soamente da capital de Galicia senón dunha parte significativa de moitos españois que con unha viaxe moi curta en tempo teñan a Noia como referente, polo seu porto, pola beleza da súa paisaxe, pola súa vila, gastronomía, clima etc, un potencial de mil catrocentos amarres xerarían numeroso postos de traballo, un mínimo de cento cincuenta, número calculado en base o que din os medios entendidos partido por catro.
O anterior debemos engadir a recuperación da praia de Labarta, máis de mil douscentos metros lineais de praia metidos na trama urbana, a recuperación do resto do borde litoral para ouso de residentes e visitantes e a creación dun paseo que bordee o esteiro de Noia integrado este no medio, a potenciación dos restantes valores naturais propios dun espazo rede natura, fan que os veciños desta comarca teñan un potencial de futuro inmenso, un espazo público de todos e que todos teñen que loitar para sacar adiante e esixir de quen teña a regalía de poder xestionar o faga atendendo única e exclusivamente a búsqueda do interese xeral, pois repetimos de todos é.
A crise non debe ser obstáculo para o que se pretende, máis ben o contrario, pois permitiría a utilización de medios humanos e materiais propios da administración agora mesmo ociosos diante da falta de recursos para investir en obra, sabemos ben que unha tramitación administrativa como a que se pretende levaría como mínimo tres anos, logo deles sería de esperar que as cousas mudaran.
Xuntamos un plano no que se concretan o conxunto das actuación a realizar nas primeiras anualidades.
En base o resumo que se sinalou, proponse as forzas políticas que conforman o Pleno do Concello de Noia, a adopción dos seguintes
A C O R D O S
1.- O Pleno do Concello de Noia diríxese ao Ministerio de Medio Ambiente, Medio Rural e Mariño; Secretaría Xeral do Mar, Dirección Xeral de Sostibilidade da Costa e do Mar a Comunidad Autónoma de Galicia, Consellería do Mar, Portos de Galicia para que procedan a unha actuación conxunta redactando verdadeiro proxecto de rexeneración, recuperación do porto e do litoral conforme plano que se acompaña a presente, programando así mesmo cantas posteriores anualidades correspondan para unha completa execución das actuación que este Pleno demanda.
2.- O Pleno do Concello de Noia acorda así mesmo dirixirse aos Grupos Parlamentares que conforman o Parlamento de Galicia e as organizacións políticas con representación no Congreso dos Deputados para que tomen canta iniciativa consideren na defensa das demandas que se conteñen na presente moción.
3.- O Pleno do concello de Noia comprométese a colaborar co resto das administracións en todo aquilo que esté o seu alcance para a realización do proxecto mencionado así como a adopción de cantes medidas sexan necesarias para a adecuación do futuro plan xeral o proxecto que se redacte.Posted via email from Certo.gl, o xornal dixital de Barbanza e Noia
No hay comentarios:
Publicar un comentario