Barbanza, por Certo: Rianxo: "Airiños" non recollerá o premio da Cultura Galega na categoría de Artes Escénicas en apoio aos traballadores deste sector e aos músicos

21.2.13

Rianxo: "Airiños" non recollerá o premio da Cultura Galega na categoría de Artes Escénicas en apoio aos traballadores deste sector e aos músicos

A entrega era hoxe na Cidade da Cultura
Non o rexeitan, pero non asisten á entrega institucional como xeito de protesta

Rianxo, 21 de febreiro de 2013. O Cadro Artístico Airiños de Asados, en Rianxo, grupo de teatro afeccionado en activo máis antigo da Galiza, non vai asistir á entrega dos Premios da Cultura Galega, na Cidade da Cultura, en apoio aos traballadores das artes escénicas e musicais que estes mesmos días se manifestan alí mesmo polo parón que sofre o sector. "Sumámonos así á Asociación Internacional de Estudos Galegos (AIEG), que tamén se solidarizaron deste xeito coas persoas implicadas e comprometidas coa cultura de Galicia", explican dende este colectivo rianxeiro.

Este grupo de teatro amador, como xa informamos no seu día, foi o premiado na categoría das Artes Escénicas “polo traballo desenvolvido desde a súa creación, no ano 1933, que o converte no máis lonxevo de Galicia. Así, ao longo de catro xeracións, esta iniciativa veciñal vén sendo protagonista da construción dunha creatividade escénica de raíz popular desde o ámbito local”. O colectivo teatral "Airiños" agradece este recoñecemento institucional "que de ningunha maneira rexeitamos, xa que son moitas as persoas que traballaron para chegar ata aquí, e tampouco somos quen para rexeitar un premio que, entre outras cousas, non nos pertence ás persoas que estamos agora no grupo senón a tantas outros veciños e veciñas de Asados e Rianxo que se subiron ás táboas durante tantos anos".

E rematan sinalando que "a pesar de que foi unha decisión difícil de tomar, finalmente a maioría dos actuais membros adultos en activo de Airiños decidimos sumarnos á protesta do sector teatral con esta decisión: non acudir ao acto de entrega dos premios. Apoiamos así ao sector teatral ao que, dende o afeccionado, pertencemos. E sumámonos a unha protesta que nos atinxe a todos nós: sexa como teatreiros, sexa como consumidores de cultura".

Antes, en Certo:

Premio: Airiños, premio das Artes Escénicas nos Cultura Galega 2012