.
Aproveitando o carácter conmemorativo do 2010, ano mundial da biodiversidade, a CMVMC de Muro está a organizar a Xornada Verde Muro 10. Este evento, integra distintas actividades deportivas e culturais, que teñen como nexo común o contacto directo dos/as participantes coa natureza local. O fin último é a reconciliación entre as novas xeracións locais, e a contorna onde residen. A Xornada Verde Muro 10 é un primeiro paso dentro do roteiro que nos achegue á natureza que nos deixaron as xeracións pasadas, e con isto, iniciar un proceso de posta en valor da súa riqueza.
.
A Xornada Verde Muro 10 ofrece ás persoas participantes as seguintes actividades:
.
1.- Andaina Popular Verde Muro 10 (hora de inicio da actividade: 9.45h.)
Na primeira actividade do día, os/as inscritos/as deberán cubrir un circuíto, dende a praia de Seráns (explanada do chiringuito O paraíso), ata a Ermita de San Bieito de Seráns. Como o seu nome indica, nesta actividade o importante non é quen chega primeiro, senón desfrutar da paisaxe mentres o/a participante camiña cara a meta.
Ficha de inscrición andaina verde muro 10
.
2.- Carreira Verde Muro 10 (hora de inicio da actividade: 11.30h.)
Por primeira vez na parroquia de Muro, propoñemos a organización e realización dunha carreira de monte. O percorrido desenvólvese sobre un circuíto mixto, onde se combinan pasos de madeira costeiros, pistas de barro, camiños irregulares e pista asfaltada. O circuíto será debidamente sinalizado nas zonas onde así o necesite. A lonxitude é de 8.5 Km, cun desnivel de aprox. 200 mtrs. O deseño da carreira asegura:
- O paso dos/as participantes por zonas de alto interese natural
- O aproveitamento de camiños históricos e sendas estratéxicas
- Acadar un desnivel (m.) que destaca a sucesión de biótopos
Ficha de inscrición carreira verde muro 10
.
Máis info:
Mapa do percorrido (precísase aplicación Google earth)
Introdución aos adestramentos para carreiras
.
3.- Xogos tradicionais (dende as 16.00 en adiante). Con participación libre por parte dos/as asistentes á xornada.
Os xogos populares, como outros elementos culturais, conteñen diferentes concepcións que forman parte da sociedade, teñen unha dimensión lúdica e educativa, e son parte importante da convivencia e cooperación en grupo, de ahí o interese de introducilos nesta actividade que pretende afondar na creación de grupo e mellorar o clima grupal dos comuneiros/as e outras persoas que participen da actividade. Ademais, os xogos posúen un gran valor socio-cultural que sobrepasa os aspectos lúdicos, pois cada xogo presenta diferentes características dependendo da zona na que se practica.
Os xogos defínense como a actividade física ou mental que ten a finalidade de divertirse e entreterse, e dentro desta xornada deportiva, encaixa ben esta proposta de xogos tradicionais, pois está acorde a tódolos públicos, poidan ou non correr na carreira, e quere dar un remate distinto e máis distendido, onde se xunte todo o grupo de persoas. A actividade realizarase nos arredores da Ermita de San Bieito, e entre os distintos entretementos contamos con:
- Bólos
- Petanca
- Zancos
- Sacos
- Aros
- Tartarugas
- Rá
- Baralla
- Chave
Todas as ligazóns para anotarse, en http://sanpedro.blogaliza.org/2010/05/06/xornada-verde-muro-10/
Posted via web from Certo.es, o xornal virtual de Barbanza e Noia
No hay comentarios:
Publicar un comentario