Barbanza, por Certo: Deportes: a Sociedade Galega de Historia Natural pide mellores medidas de seguridade no eido da caza

9.11.10

Deportes: a Sociedade Galega de Historia Natural pide mellores medidas de seguridade no eido da caza

Recoller setas sen saber (na imaxe, unha rebentabois ou amanita muscaria) pode ser tan perigoso como ir cazar sen sentidiño

Reproducimos, polo seu interese, o artigo íntegro:

SOBRE A SEGURIDADE NA CAZA

O luctuoso accidente acontecido onte en Ordes pon novamente de actualidade o nunca resolto problema da seguridade de todos os cidadáns (non só os cazadores) durante os días hábiles de caza.

Ó respecto a SGHN reitera á Consellería de Medio Rural as peticións feitas hai xa 6 anos á Consellería de Medio Ambiente (véxanse arquivos adxuntos):

Que a Consellería de Medio Ambiente estableza para a vindeira tempada de caza a obrigatoriedade dun exame que determine a aptitude de todos os que soliciten a obtención ou renovación dunha licencia de caza.

Que, tomando como modelo as decisións do Ministerio do Interior para os permisos de conducir, a Consellería de Medio Ambiente estableza «carnets por puntos» para os titulares de licencias de caza, dos que sexan descontados puntos por infraccións da Ley de Caza de Galicia, especialmente no relativo ó incumprimento das medidas de seguridade durante a caza, pero tamén en todo o relacionado coa conservación das especies, cinexéticas ou non, afectadas pola práctica da caza.

Que a Consellería de Medio Ambiente estableza controles obrigatorios de alcoholemia, ou consumo doutras drogas, para os cazadores, pois o consumo de alcohol ou drogas combinado co emprego de armas de fogo é alomenos potencialmente tan perigoso como o seu consumo combinado coa conducción de vehículos a motor.

Que a Consellería de Medio Ambiente subvencione tamén seguros para tódolos colectivos de cidadáns que, como os cazadores, adican parte do seu tempo de lecer a actividades na natureza: sendeirismo, montañismo, recollida de cogomelos e froitos silvestres, pesca, observación de fauna e flora, fotografía da natureza, ciclismo de montaña, etc.

Que a Consellería de Medio Ambiente distribúa tamén gratuitamente entre os devanditos colectivos chalecos de alta visibilidade que axuden a reducir o seu perigo de ser víctimas inocentes de accidentes de caza.

Máis información en www.sghn.org