Ribeira: este xoves, 1 de marzo, entrega dos premios "Atlante" de gravado

• O acto terá  lugar no Museo do Gravado á Estampa Dixital de Artes 
• Presidirá, a falta do conselleiro de Cultura, que entregou os primeiros, o presidente da Xunta de Galicia
  

Na entrega do I Premio Atlante estivo o ex-conselleiro de Cultura, Roberto Varela

Ribeira, 29 de febreiro de 2012.- O presidente da Xunta de Galicia, Alberto Núñez Feijóo, presidirá a entrega dos Premios Atlante de Gravado que terá lugar mañá xoves a partir das 19.30 horas no Museo do Gravado á Estampa Dixital de Artes. Artes, para o que aínda non o saiba, é unha das parroquias de Ribeira. 

Estes galardóns están promovidos pola Fundación do Gravado de Artes, da que é presidente na actualidade o alcalde de Ribeira, o popular Manuel Ruiz Rivas. Tamén está prevista a participación no acontecemento de distintas autoridades como, entre outros, o senador e ex alcalde ribeirense José Luis Torres Colomer, alcaldes da comarca, a vicepresidenta da Deputación, María Faraldo; o vicepresidente e alma máter da Fundación, Javier Expósito ou o patrono da mesma, Ramiro Carregal Rey, quen a partir desta terceira edición da nome a un novo premio. 

Cabe recordar que o gañador na categoría Barbanza Ría de Arousa foi para a artista noiesa Sandra González Caamaño, e resultaron finalistas Ana Cambeiro, Encarna Méndez e Manuel Castro. 

Polo que respecta aos premios internacionais, o Premio Ramiro Carregal Rey foi concedido a Ramiro de Undabeytia (Madrid), e os Premios Atlante foron para Manuel Moreno Morales (Sevilla), Justo Antonio Heras Fernández (Tarragona) e Yuko Yamada (Xapón). Foron seleccionados como finalistas Hugo Besard (Bélxica), Micaela Trocello (Arxentina) e Rutmi Sassaki (Brasil). 

O xurado estivo integrado por José Manuel López Vázquez, profesor da Facultade de Xeografía e Historia da Universidade de Santiago de Compostela; Juan Monterroso Montero, decano da Universidade de Xeografía e Historia da USC; Alfonso Costa, pintor e gravador de Noia; Manuel Ayaso, pintor e gravador de Ribeira; e Daniel Buján, director da Biblioteca de Galicia.

Posted via email from Certo.gl, o xornal dixital de Barbanza e Noia