23.4.12

Ribeira: comezan as obras da rúa Celeiráns de Aguiño, que supoñen un investimento de 51.000 euros

  • O Concello vén de sacar a licitación da xestión e explotación do matadoiro por 25 anos, que prestará servizo aos catro concellos de Arousa Norte
  • A Xunta local de seguridade abordará o 9 de maio a preocupante onda de roubos no municipio


Media_httpfarm9static_emcar

 

Ribeira, 23 de abril -DÍA DO LIBRO- de 2012.- O Concello informa do inicio das obras para a instalación de pluviais e renovación de saneamento na rúa de Celeiráns, na parroquia de Aguiño. Esta actuación, cun importe de 51.000 euros, está a ser executada pola empresa Construcciones Pazo de Axeitos, S.L.

A iniciativa ten como principal obxecto solucionar os problemas de encharcamento que se producen nas fincas lindeiras ao camiño en época de choivas: un fenómeno que está provocado polo feito de que a cota destas fincas está situado por debaixo da do vial.

A tal efecto, instalarase unha rede de recollida de pluviais coa finalidade de erradicar os problemas de encharcamento, e ademais renovarase o saneamento e pavimentarase o camiño axeitadamente.

Así, a nova rede de pluviais a instalar constará dunha tubaxe de PVC corrugado de 180 metros de lonxitude e de 17 arquetas, mentres que a tubaxe de saneamento, tamén de 180 metros, será de PVC liso de 315 milímetros, renovándose as acometidas ás vivendas existentes. En canto á pavimentación, empregarase aglomerado en quente, abarcando unha área de 1.210 metros cadrados. Esta actuación corre a cargo do canon de saneamento derivado da adxudicación do servizo de augas.

Matadoiro: 25 anos de concesión prorrogables de cinco en cinco

O Concello, por outra banda, tamén acaba de sacar a licitación a contratación da xestión e explotación do matadoiro situado no municipio coa finalidade de dar servizo aos concellos integrantes da Mancomunidade de Arousa Norte (A Pobra, Boiro, Rianxo e Ribeira).

Así sae reflectido na edición do 20 de abril do Boletín Oficial da Provincia (BOP), o cal indica que a forma de explotación do matadoiro será por xestión indirecta mediante a modalidade de concesión. Esta concesión outorgarase por un prazo de 25 anos, empezándose a contar a partir do primeiro día seguinte ao da formalización do contrato. O contrato poderá ser prorrogado de cinco en cinco años ata alcanzar o máximo legal por mutuo acordo entre as partes.

A retribución do concesionario estará constituída por:

a) As tarifas do servizo de matadoiro e carrexo de carnes vixentes en cada momento.

b) Os ingresos derivados doutras actividades complementarias, como o despece, o envasado de carnes ou calquera outro aproveitamento dos produtos ou servizos do matadoiro.

c) As retribucións especiais que o Concello, previo acordo da Mancomunidade, estime oportuno, nos casos de renovación ou ampliación das obras existentes.

Con estes ingresos o concesionario cubrirá a totalidade dos gastos de explotación, entre outros: persoal, gastos de conservación das instalacións, electricidade, auga, transporte, administración, materiais, gastos xerais, compras a terceiros, amortización de inversións, gastos financeiros, beneficio industrial, o canon da concesión, taxas da Comunidade Autónoma e outras.

Canon

O canon mínimo que haberá de satisfacer o adxudicatario ao Concello é de 3.000 euros anuais, ou o que propuxera o licitador de resultar superior. Este canon será revisable anualmente conforme ao IPC de acordo coa fórmula de revisión das tarifas.

O prazo de presentación de ofertas no Rexistro Xeral do Concello terá lugar nos vinte días hábiles posteriores ao da publicación do citado anuncio de licitación no BOP (no caso de que o día de finalización do prazo, resultase sábado ou festivo, quedará automaticamente prorrogado ao día hábil seguinte).


Onda de roubos: a análise o 9 de maio


Os episodios de roubos que se están producir nas últimas semanas en distintos puntos do municipio van ser analizados durante a celebración dunha Xunta Local de Seguridade que, convocada polo Concello, vai ter lugar a principios do mes de maio: concretamente, o día 9 ás 12 do mediodía.


Esta Xunta Local contará coa participación de representantes do Concello (co alcalde á cabeza), a Xunta de Galicia e a Administración Estatal (vía subdelegación do Goberno) e das distintas forzas de orde público.

Dende o Executivo agárdase que a celebración desta Xunta sirva para que, tras estudar o tema, se adoiten consensuadamente aquelas medidas que sexan máis axeitadas en orde a afianzar a seguridade cidadá e combater este tipo de sucesos delictivos.

Pode que tamén lle interese:

 


 

Posted via email from Certo.gl, o xornal dixital de Barbanza e Noia

Cultura: Antón Riveiro Coello, un dos fundadores de Barbantia, logra o Premio da Crítica por "Laura no deserto"

http://www.aelg.org/resources/centrodoc/members/photos/1169033135132anton.jpg;jsessionid=9364DF41612BCC68993089F0B153E73B
Imaxe da Asociación de Escritores en Lingua Galega de Riveiro Coello

Barbanza, 23 de abril -Día do Libro- de 2012. O escritor Antón Riveiro Coello, natural de Xinzo de Limia pero barbanzano de adopción, vén de gañar o Premio da Crítica española pola mellor obra de narrativa en galego pola súa última novela, "Laura no deserto". Na categoría de poesía gañou Olga Novo, unha das poucas literatas galegas que lle adica tempo ao erotismo na nosa lingua. O poemario polo que foi premiada titúlase "Cráter".


Info da novela "Laura no deserto" na páxina de Galaxia:

Compostela, Barcelona, Europa durante a Segunda Guerra Mundial, Nova York a fins do século XX, son os escenarios dunha obra narrativa que ergue un sólido universo e entra na alma dos personaxes para nos falar cunha voz intensa sobre a identidade, a culpa, o amor ou a liberdade.

A nova novela de Riveiro Coello iníciase na primavera de 1982 en Barcelona co achado dunha carta e vai espallando a súa trama por Compostela, Nova York e a Pobra do Caramiñal. O autor de As rulas de Bakunin consegue artellar unha novela na que aventura vital, epopea social e interese narrativo se xuntan. As historias de Diana, que na Barcelona de 1982 atopa unha carta onde se descobre un pasado familiar ata daquela agochado; a dos últimos días da vida dun intelectual en Compostela, que lega ao seu fillo un enigma aínda non resolto; os intentos de Bob, un fotógrafo retirado de Brooklyn, por salvar a Bernie, un amigo que probou o suicidio, e a historia do destino ignoto dunha muller que se debate por conservar os últimos gromos da memoria.

Velaquí unha trama na que a resolución das liñas narrativas lle pide tamén ao lector ou lectora un posicionamento perante o narrado que o ha implicar ineludiblemente na novela. Escrita co característico estilo preciso e envolvente de Riveiro Coello, Laura no deserto é unha das grandes achegas narrativas da novela galega contemporánea.

Crítica de Xosé Manuel Eyré en Galicia Confidencial, aquí

Posted via email from Certo.gl, o xornal dixital de Barbanza e Noia

21.4.12

Boiro: os ribeirenses de Lizard Crash pasan a cuarta eliminatoria do Curota Sound

  • Esta noite disputan o pase as boirenses Agoraphobia e a banda de Ribeira Entrelineas


Lizard Crash practica o heavy metal máis clásico

Lizard Crash pasou a cuarta eliminatoria no Curota Sound.pdf Download this file

Posted via email from Certo.gl, o xornal dixital de Barbanza e Noia

Noia: Iker Mugarra, de Euskadi, gañou o V Certame "Fernández Leiceaga" de pintura ao aire libre

Media_httpfarm6static_vabnh

O nivel en cada certame convocado vai a máis, segundo puideron constatar o xurado e os que se achegaron a interesarse polas pinturas ao mercado da arte que estará ata mañá no claustro do Concello

Noia, 21 de abril de 2012. En Noia, sendo as 17:45 horas do día 21 de abril de 2012, reúnense os membros do xurado que outorgará os premios do V Concurso de Pintura ao Aire Libre "Juan Fernández Leiceaga, Sesé", organizado polo Concello de Noia. Forman o xurado Alfonso Costa Beiro, pintor, como presidente do mesmo; Javier Rodríguez Vieites, concelleiro de Cultura e vogal do xurado; Pedro Bueno Salto, pintor e tamén vogal; Xosé Luís Veiras Manteiga, pintor, tamén vogal; Xosé Vázquez Castro, pintor e tamén vogal; Isabel Pintado Palacio, pintora e tamén vogal e María Concepción Allut Vidal, técnica de Cultura do Concello e secretaria do xurado.

Rematadas as deliberacións, estes son os premiados:

Media_httpfarm6static_hgjan

1 premio
Iker Mugarra SanMartín (Vizkaia)
2000 €

Media_httpfarm6static_kaefg

2 Premio
Fernando Rey Castiñeira (Muros)
1500 €

Media_httpfarm8static_opjps

3 Premio
Alberto David Fernández Hurtado ( Segovia )
1000 €

Media_httpfarm6static_hiexe

Premio especial LA CAIXA
Francisco Solano Jiménez Castro
800 €

Media_httpfarm6static_juoke

Premio NOVOS VALORES
patrocinado pola FUNDACIÓN OTÍLIA BLANCO MILLARES
Irene Cuadrado Hernández
600 €

Media_httpfarm6static_aezoq

Premio EDICIONES BOREAL
patrocinado por EDICIONES BOREAL
Lolo Serantes Morán
600 €

Accésits:
Raúl Velloso Lago
Manuel González Núñez
Eduardo Baamonde Pérez

Mención especial a nenos menores de 10 anos:
Miriam Iglesias Romero
Valentina Veynberg
Lola González Cierto

Posted via email from Certo.gl, o xornal dixital de Barbanza e Noia

Rianxo: as zanfonas saíron á rúa, polo menos cinco minutos, na "Zona da Zanfona"

Rianxo, 21 de abril de 2012. Comezou a rolar a Zona da Zanfona, o Encontro Internacional sobre este instrumento que aCentral Folque, Centro Galego de Música Popular,  leva organizando desde o 2005 e que achega figuras de renome mundial para amosen o seu maxisterio e arte ao público galego. Este ano o festival transladouse a Rianxo logo de sete anos en Narón e a resposta do público local -segundo os organizadores- está sendo moi positiva.

As actividades céntranse nun curso de experiencias prácticas cos zanfonistas franceses Patrick Bouffard e Gilles Chabenat, dous dos mellores zanfonistas de Europa con máis de 25 anos de carreira. Este curso ten inscritas 22 persoas de toda Galicia que reciben as aulas maxistrais destas dúas figuras. O curso transcorre este sábado e domingo no Auditorio.

Pero o programa comezou o venres pola tarde cunha xuntanza destes cursillistas e outros músicos no centro de Rianxo que sacaron as "zanfonas á rúa", nome que recibiu esta actividade. Esta acción sonora quedou deslucida porque xusto cando levaban cinco minutos tocando comezou a chover e tivéronse que resgardar na Biblioteca Municipal, levando consigo ao público curioso que quería oir como soaban estes "sintetizadores medievais".

Xa pola noite no Auditorio os presentes desfrutaron dun magnífico concerto dos mestres convidados para esta edición Patrick Bouffard e Gilles Chabenat que presentaron por primeira vez na Península o seu disco "Tour à Tour" (Volta a volta) nun exercicio de virtuosismo sen parangón sobre composicións de inspiración na música popular pero que ás veces tiña máis un parecido cun concerto de rock. Este dúo de zanfonas posúe un groove -sensación ritmicamente expansiva- que o público non agardaba e quedaron moi sorprendidos.

Este sábado pola noite terá lugar no cámping de Rianxo o palco aberto, unha foliada aberta a calquera persoa que queira compartir a súa música con estes zanfonistas. Despois da cea e até que a corda aguante.


Posted via email from Certo.gl, o xornal dixital de Barbanza e Noia

20.4.12

Detalle Aurelio Aguirre


Detalle Aurelio Aguirre
Cargado originalmente por xornalcerto

Aurelio Aguirre, amigo de Rosalía de Castro

Ribeira: San Roque, meta do Meigas Galicia, club motociclista de Vigo, este sábado 21



Ribeira, 20 de abril de 2012. Mañá sábado está prevista a chegada de 21 moteiros do club vigués Meigas Galicia interesados en coñecer os lugares turísticos máis emblemáticos do municipio. Cada ano, este elenco motociclista da cidade olívica acostuma realizar un percorrido por algún punto da xeografía galega e en 2012 Ribeira foi o destino escollido.

Así, está prevista a chegada destes apaixonados das dúas rodas ao parque periurbano de San Roque entre as 10.30 e as 11 horas. No transcurso da seguinte hora (máis ou menos ata o mediodía) terán a oportunidade contemplar as dúas exposicións que se exhiben dentro do Centro de Interpretación Arqueolóxica (“A pegada e o reflexo”, que incide no período megalítico, a Idade de Bronce e a Idade de Ferro; e “A través do tempo”, sobre a evolución cronolóxica dis recursos patrimoniais, etnográficos, culturais e históricos existentes no concello), así como coñecer a zona exterior do recinto se o tempo acompaña.

No resto do día de mañá, os integrantes de Meigas Galicia percorrerán outros puntos de interese de Ribeira, como o miradoiro de Pedra da Rá ou o parque natural de Corrubedo.


Posted via email from Certo.gl, o xornal dixital de Barbanza e Noia

Ribeira: Francisco Antonio Vidal falou dos ritos paganos de fecundidade en San Alberte

Ribeira, 20 de abril de 2012.- Por segunda semana consecutiva, o salón de actos do Conservatorio rexistrou  unha nutrida concorrencia de público para asistir a outra conferencia dos Xoves Literarios. Nesta ocasión foi o literato Francisco Antonio Vidal Blanco (nacido na Bouciña, en Palmeira, en 1957) o que deleitou aos asistentes cunha comparanza entre os fastos, mitos, crenzas e celebracións da antigüidade e as festas e romarías de hoxe.

 

Para impartir a súa charla, Vidal Blanco baseouse no seu libro “Dos Fastos aos Festexos”, publicado en 2009 en colaboración con Rosa B. Vizcaya, e apoiouse para as súas argumentacións nunha ampla profusión de imaxes representativas.

 

San Alberte

O autor non desaproveitou a ocasión para incidir nalgúns dos ritos que aínda hoxe perduran no municipio ribeirense. Tal é o caso dos actos consistentes en “virar a tella”, “tirar a tella” e “bendicir as terras dos campos”: tres rituais que, sen ir máis lonxe, puidéronse ver o pasado luns con motivo da romaría de San Alberte. O de virar a tella sería para que as mulleres dos mariñeiros atraesen os ventos propicios cos que os seus homes voltasen do mar; o de tirar a tella sería un ritual de esperanza e fecundidade, polo cal, o que tivese a sorte de deixar o mesmo anaco de tella, tirado tres veces, no antepeito da fiestra da capela de San Alberte onde se fai o rito, atoparía parella ese mesmo ano. Xa o de bendecir os cestos con terra do monte sería tamén parte do ciclo de festas de primavera -os maios, xa prerromanos- que buscan atraer a fecundidade para os campos recén sementados.

 

Francisco Antonio Vidal ten publicado oito novelas (a última delas, “As deusas do Calvario” en 2010) e diversos ensaios e obras de teatro. Entre os seus premios literarios cabe destacar o premio do Concello de Vilalba de novela nos anos 1992 e 1998, o Premio de Literatura Infantil Ólisbos en 1993, o da Casa de Galicia de Baracaldo en 1997, o do Concello de Viveiro en 2003 ou o Terra de Melide en 2007.


Paz Andrade no vindeiro Xoves Literario

 

A semana que vén terá lugar a última das xornadas dos Xoves Literarios  que promove o Concello no marco da programación do Abril Mes dos Libros 2012. Con tal motivo, a Corporación Local renderá un tributo ao homenaxeado deste ano no Días das Letras Galegas, coa conferencia “O multifacetismo emprendedor de Paz-Andrade” que pronunciará Xesús Manuel Valcárcel. Será de novo ás 20 horas no Conservatorio.

Posted via email from Certo.gl, o xornal dixital de Barbanza e Noia

Educación: Xuventudes Socialistas Galegas din que coa suba de taxas "queda unha universidade só para ricos"

  • As Xuventudes Socialistas denuncian que o PP "rachou co concepto de Educación pública" e lembran que "despois de aniquilar a educación primaria e a secundaria agora rematan coa educación universitaria co aumento indiscriminado de taxas"
  • “O aumento das taxas logo de rebaixar de forma brutal as bolsas universitarias supón que moitos estudantes terán que abandonar os seus estudos o ano que vén”
  • “Estamos ante as portas do que nos temíamos e levamos denunciando durante os últimos anos en Galicia: a privatización absoluta do ensino”, aseguran

Barbanza e Noia, 20 de abril de 2012. As Xuventudes Socialistas de Galicia (XSG) manifestaron onte, en rolda de prensa,  que o incremento de taxas universitarias anunciado polo Goberno de ata un 70% é "un mazazo insuperable para o estudantado". Para a organización xuvenil “non poden ser os estudantes e as súas familias o que paguen a crise, algo que sucederá co recorte masivo do orzamento educativo e o incremento das taxas, xa que o único que se consigue con iso é que só accedan á educación as persoas con rendas máis altas”.

Segundo María Torres, secretaria xeral das XSG, “o aumento das taxas logo de rebaixar de forma brutal as bolsas universitarias supón que moitos estudantes terán que abandonar os seus estudos o ano que ven”, ademáis “as xeracións futuras estarán obrigadas a renunciar a cursar ensinanzas universitarias se non poden pagalas”, engadíu.

Así, as XSG manifestáronse en contra da subida das taxas universitarias e advertiron ao Goberno de que “non imos permitir que a Universidade se convirta nunha institución elitista onde só teñen cabida os que se poden permitila economicamente”.

A xuízo de Torres, “nunha situación de crise como a actual o goberno tería que incrementar os orzamentos en materia educativa e apostar pola calidade do ensino en lugar de aniquilar a educación pública”

Juan Jesús Sánchez, secretario de Educación e Universidades das XSG, denunciou que “a baixada do 21,9% nos orzamentos xerais do estado, a supresión masiva das bolsas universitarias e agora o aumento das taxas sitúannos ante as portas do que nos temíamos e levamos denunciando durante os últimos anos en Galicia, a privatización absoluta do ensino”. A subida de taxas universitarias, engadíu, “supón que os alumnos que ata hoxe pagaban 1.000 euros ao ano, deberán elevar a súa contribución un 50% sobre o custo total”, “os mesmos alumnos que, en moitos casos, xa non poderán contar co sistema de bolsas do ano pasado”. Ademáis, o “novo sistema penalizará aos alumnos que suspendan e teñan que volver a matricularse, que poden chegar a pagar o 100% da praza, uns 6.000 euros aproximadamente”.

A organización xuvenil do PSdeG-PSOE denuncia, ademais,  que estamos ante a morte directa da educación pública e lembran que a destrucción educativa comezou primeiro na educación galega: aumentando o cociente de alumnos por aula, suprimindo a escolarización de 0 a 3 anos, aumentando as horas lectivas por profesor, retirando as axudas de alumnado con necesidades educativas especiais e as asfixiando os orzamentos das universidades galegas da man de Feijóo, entroutas. “Galicia é o laboratorio dos recortes do PP”, comentou Sánchez, quen tamén acusou ó Goberno de Feijoó de “aprobar e aplaudir os recortes educativos propostos polo Goberno de Rajoy”

Por último, as Xuventudes Socialistas, consideran que “estas decisións do PP van provocar xeracións perdidas por falta de formación e escaseza de oportunidades” e aseguran que “é un novo mazazo ao Estado do Benestar”

Máis info en www.xuventudessocialistas.org

Mariatorres

MariatorresXSG.mp3 Listen on Posterous

Posted via email from Certo.gl, o xornal dixital de Barbanza e Noia

Educación: Iniciativa Estudantil Galega tacha de "ataque brutal" a suba das taxas do goberno do PP

  • “Chegou o momento de que os estudantes planten cara ao maior ataque en educación da historia” , din dende esta asociación estudantil

  • Juan Jesús Sánchez, coordinador de IESGA:

    “a suba de taxas universitarias proposta por Wert é inceptable e supón a privatización da universidade pública, ademais de eliminar a posibilidade de acceder á Universidade a miles de estudantes”

Barbanza-Noia, 20 de abril de 2012. A suba de taxas de matrícula universitaria exposta hoxe polo Ministro de Educación, é, para a organización estudantil IESGA,  “brutal e inxustificable” e “obriga ao estudantado en moitos casos a ter que abandonar a carreira”. Para a organización, “estas medidas son un retroceso na educación pública e nos dereitos estudantís”. A organización de  estudantes progresistas considera que “esta suba das taxas universitarias, sumada á brutal diminución das bolsas e aos graves recortes aplicados en Educación, eliminará a posibilidade de acceder á Universidade a miles de estudantes o vindeiro curso”

Dende Iniciativa Estudiantil Galega manifestan o seu desacordo con esta suba que consideran “non só abusiva, senón tamén manifestamente inxusta para o estudantado”.

Para Juan Jesús Sánchez, coordinador de IESGA, “todas estas medidas na universidade atacan á igualdade de oportunidades dos estudantes”. “É inxustificable subir as taxas universitarias mentres se reducen as bolsas indiscriminadamente”, comentou,

Sánchez, lembra ademáis que “desde IESGA defendemos a educación pública como dereito e non como o privilexio daqueles que se poden permitir pagalo”. Por outra banda, denuncia que “ este incremento das taxas de matrícula universitaria non vai parello o incremento de bolsas, senón a un recorte brutal nas axudas ó estudo”. “As taxas de matrícula non se establecen en función da renda anual, senón que son iguais para todos, polo que terá que pagar o mesmo unha persoa de baixos ingresos que alguén con moitos recursos económicos”, explicou.

A Organización denuncia que as medidas de Wert son o comezo dun camiño a unha universidade de élite, á que só poderán acceder ou permanecer nela aqueles que dispoñen de maiores posibilidades económicas. Sánchez advertíu que “chegou o momento de que os estudantes planten cara ao maior ataque en educación da historia” e aseguran que haberá mobilizacións en vindeiras datas.

Máis info: www.iesga.es






Juan-jesus-sanchez-iesga-1024x

Voz_007.mp3 Listen on Posterous

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical