Ribeira: comezou o obradoiro de teatro para persoas sen teito ou con condutas adictivas

Ribeira, 13 de outubro de 2011. Logo dunha pequena presentación celebrada o pasado martes, hoxe tivo lugar no Auditorio a primeira das sesións pertencentes ao obradoiro de teatro que, no marco do Plan Comunitario Municipal 2011-2012 do Concello de Ribeira, foi concibido co propósito de incidir na socialización de veciños sen fogar ou con problemas de adiccións. Un total de nove persoas (dúas das cales non puideron asistir á sesión de hoxe por causas xustificadas) prestáronse voluntarias a participar nesta novidosa iniciativa, que segue aberta a outros cidadáns con este tipo de problemas que queiran sumarse á experiencia, ata contabilizar un máximo de vinte. 

A metodoloxía empregada durante o desenvolvemento do taller é a do “rol playing”, no que o teatro xoga un papel de escusa para escenificar situacións reais que lles sirvan aos asistentes para desenrolar as súas habilidades sociais, a súa empatía, capacidade para resolver conflitos, adopción de hábitos saudables e autoestima. 

Representación pública

Cada unha das clases, duns 90 minutos de duración, consta dunha introdución teórica e unha parte práctica. Terán lugar tres días por semana ata sumar 100 horas. Se fose factible, e aínda que non sexa o obxectivo do taller, unha vez completado o mesmo os participantes actuarían nunha pequena representación teatral aberta ao público. Así o afirmou o concelleiro de Servizos Sociais e Promoción Social, Vicente Mariño de Bricio, que hoxe se achegou ao Auditorio para dar a benvida aos asistentes. 

O obradoiro de teatro só e unha das diversas accións enmarcadas dentro do Plan Comunitario Municipal dirixidas á deshabituación de condutas adictivas. Outras actividades inciden na promoción de hábitos de alimentación, vestimenta ou perruquería, etc...

Pode que tamén lle interese:

Libro: este sábado 15, "50 lugares mágicos de Galicia"

Mobilizacións para faenar en Sálvora: este sábado 15, de Aguiño a Vigo

Lan Party UxíaNet 1.1: do 14 ao 16 de outubro. Programación

 

See the full gallery on Posterous

Posted via email from Certo.gl, o xornal dixital de Barbanza e Noia

Fútbol: o Sálvora, campión do I Torneo Prebenxamín F8 "RIA DE AROUSA"

Ribeira, 13 de outubro de 2011. O equipo Prebenxamín do Sálvora CF, adestrado por Anxo Orellán, proclamouse brillantemente Campeón no I TORNEO PRE-BENXAMIN F8 "RIA DE AROUSA", que se levou a cabo no Campo de Berdón, en Vilagarcía de Arousa e organizado pola Escola Deportiva Arousa, onte mércores 12 de Outubro.

Na fase de grupos tiveron estes resultados:

Sálvora 6 - Cabo de Cruz 0

Sálvora 5 - CD Boiro 0

Sálvora 4 - X. Cambados 1

 

En Cuartos de final: Sálvora 2 - Pontearnelas 0

En Semifinais: Sálvora 2 - San Martín 0

FINAL: Sálvora 7 - E.F. Vilanova 0

www.salvoracf.blogspot.com

See the full gallery on Posterous

Posted via email from Certo.gl, o xornal dixital de Barbanza e Noia

Outes: "Aquelar" organiza un roteiro de sendeirismo para promocionar o municipio este sábado 15

Outes, 13 de outubro de 2011. A asociación cultural “Aquelar” de Outes esta a organizar unha ruta de sendeirismo que terá lugar o vindeiro sábado día 15. O roteiro escollido será a que vai dende Albán (Rates) ata o merendoiro do Monte Tremuzo e que durará aproximadamente unhas 4 horas. A saída está programada para ás 10:00. 

O obxectivo desta andaina é promocionar as rutas de sendeirismo que ten o Concello e que "están sen explotar pola corporación municipal", aseguran dende esta novísima asociación. 

Tamén na reunión que tiveron a pasada semana acordouse un achegamento "a todas as asociacións do Concello coa fin de realizar actividades comúns para así garantir o éxito". Unha delas será o magosto, que aínda está pendente de programar. 

Animan a todo o mundo a que acuda a esta cita, a pasar un día de lecer polo Concello de Outes.

Dende Certo animámolos ese día a cambiar o mundo. Tamén aos de Outes.

Posted via email from Certo.gl, o xornal dixital de Barbanza e Noia

Política: Jorquera presentou en Rianxo a candidatura comarcal para o 20N

• Proclama a utilidade do Bng por ser "o único partido que leva os problemas de Barbanza ao Congreso dos Deputados
• Na presentación da candidatura comarcal, o cabeza de lista por A Coruña chamou a “incrementar a representación do BNG para que esta comarca teña representación directa através de Rosana Pérez”
  

Jorquera reivindicou o investimento no Pazo de Goiáns como un dos logros do Bng

Rianxo, 13 de outubro de 2011. O cabeza de lista do BNG ao Congreso por A Coruña, Francisco Jorquera, participou esta tarde no acto de presentación da candidatura comarcal do Barbanza onde tamén estiveron Rosana Pérez (A Pobra do Caramiñal) e Adolfo Muiños, actual alcalde de Rianxo. Neste encontro, Jorquera fixo un chamamento a incrementar o respaldo do BNG nas eleccións do 20-N porque “somos garantía de que Rianxo e esta comarca teñan voz no Congreso dos Deputados”. O candidato nacionalista puxo en valor a utilidade do BNG porque “nesta pasada lexislatura levamos os problemas da comarca ás Cortes”.

O BNG defendeu nesta lexislatura ao sector pesqueiro, á conserva e máis investimentos para O Barbanza

Neste sentido, aludiu ás iniciativas realizadas en defensa do sector pesqueiro, en concreto, denunciando os recurtes das cotas en especies como a xarda e o lirio. Tamén salientou as numerosas iniciativas en defensa dos intereses do sector conserveiro, sobre todo demandando ao Goberno central unha postura de firmeza ante a UE para que se eliminen os privilexios arancelarios ás conservas procedentes de Asia que tanto prexudican ao sector galego con forte presenza na comarca.

Asemade, fixo alusión  ás negociacións do BNG durante as tramitacións dos distintos Orzamentos Xerais do Estado nos que “conseguimos melloras como investimentos para o Pazo de Goiáns”.

O cabeza de lista do BNG asegurou que “concorremos a estas elecións coa conciencia de que somos a equipa da casa. Sabedores de que é fundamental apostar por nós nesta carreira porque somos a alternativa útil para Galiza e para O Barbanza. Somos a garantía de que a comarca teña voz na política estatal”. Así, pediu o respaldo social para poder incrementar a representación do BNG e que “esta comarca teña representación directa a través de Rosana Pérez”.

Antes, en Certo:

• Política: intensa precampaña do Bloque nestas bisbarras

Tamén lle pode interesar:

• Noia: o Bng leva ao Parlamento a desfeita de Taramancos

Posted via email from Certo.gl, o xornal dixital de Barbanza e Noia

Dodro: case un milleiro de corredores na Pedestre de Lestrobe, dos que máis da metade cruzou a liña de meta

• Na absoluta feminina Esther Pedrosa gañou por cuarto ano consecutivo
• Alejandro Begega foi o gañador absoluto en homes e en clasificación por equipos, levouse o primeiro posto Atletismo Sar-A Poutada

Dodro, 13 de outubro de 2011. Onte, mércores 12 de outubro, celebrouse no Concello de Dodro carreira pedestre de Lestrobe, que cheou á súa decimoterceira edición. Nun día soleado e con temperaturas estivais, celebrouse esta cita que pouco a pouco se está convertendendo nunha referencia a nivel galego, dentro do circuito "Correr en Galicia", cunha distancia de 10.000 metros.

A inscrición foi todo un éxito superando os 900 corredores, unha cifra máis que aceptable, que acerca á proba cada vez máis ás grandes carreiras de Galicia. Chegaron a meta máis de 500 atletas. Ás 17:30 comezaron os "pitufos", seguidos pola categoría benxamín-alevín e infantil-cadete. A proba absoluta comezou ás 18:30, hora na que o sol aínda se facía notar con forza e que esixiu un maior esforzó ós atletas.

Na xeral absoluta masculina o gañador foi Alejandro Begega Ordiz, que completou o recorrido en 33 minutos e 46 segundos. Foi seguido por José Manuel Vieito Vilacoba, como segundo, e Abel Barros González, de terceiro.  Na xeral absoluta feminina venceu por cuarto ano consecutivo Esther Pedrosa Carrete cun tempo de 40 minutos e 10 segundos. Acompañárona no podio Raquel Suárez Pedrosa e Esther Navarrete Santana.

O primeiro clasificado por equipos foi o Atletismo Sar-A Poutada, seguido no caixón por Atletismo Milladoiro e Atletismo Noitebra.

A entrega de premios foi seguida por un numeroso grupo de afeccionados. Asistiu o deputado provincial Albino Vázquez Aldrey e a corporación municipal de Dodro encabezada polo alcalde Valentín Alfonsín Somoza. En total repartíronse 70 trofeos.

O Concelleiro de Deportes de Dodro, José Núnez, valorou esta nova edición porque "serve como imaxe da aposta do Concello de Dodro polo deporte e polo compromiso coas persoas vinculadas ó mesmo". Agradeceu publicamente ás casas comerciais o apoio prestado para que esta actividade deportiva saia adiante.

Posted via email from Certo.gl, o xornal dixital de Barbanza e Noia

Ribeira: van despezar a "Vianto III", embarcación no desleixo e con risco de afundimento

• Portos de Galicia seguirá o procedemento habitual, en col da seguridade para o resto da flota e usuarios, tralas advertencias previas ao armador
• A acción terá un custe de case 30.000 euros, que deberá pagar o propietario
  

Imaxe de arquivo de barcos en Ribeira. Ningún é o aludido na noticia

Ribeira, 12 de outubro de 2011.- Portos de Galicia vén de iniciar o proceso de retirada e e despece da embarcación Vianto III, abandoada e con perigo de afundimento no porto de Ribeira. O ente público investirá 26.904 euros nesta actuación, en aras da seguridade para o resto da flota e os usuarios. Os gastos serán repercutidos ao propietario da embarcación.

Portos de Galicia toma esta decisión despois de máis dun ano de abandono da embarcación, nun estado de notable deterioro e tras os preceptivos avisos ao armador para evitar esta retirada forzosa e o despece do barco.

O 26 de xaneiro deste ano foille dada á firma armadora orde de retirada inmediata da embarcación, reservándose Portos de Galicia o dereito de retirala forzosamente, pasándolle posteriormente os gastos á empresa. Ante a falta de resposta do propietario, o ente público solicitou inspección e informe técnico da situación da embarcación en materia de seguridade á Capitanía Marítima de Vilagarcía. A resposta desta entidade establece un “moi alto risco” de dano ás persoas, medio ambiente e dominio público.

Con estes datos técnicos reitérase a orde de retirada urxente, que de novo non é atendida polo armador. É esta a situación que obriga a Portos de Galicia a facerse cargo da actuación, para preservar a seguridade e operatividade dos usuarios do porto de Ribeira. A embarcación será, por tanto, despezada nos astaleiros Aguiño, segundo informou hoxe a Xunta.

Pode que tamén lle interese:

Libro: este sábado 15, "50 lugares mágicos de Galicia"

Mobilizacións para faenar en Sálvora: este sábado 15, de Aguiño a Vigo

Pádel: "están trabajando en ellouu" en Ribeira. Medio millón para catro pistas

• Ribeira: Renacer programa a súa cea benéfica o 28 de outubro

Posted via email from Certo.gl, o xornal dixital de Barbanza e Noia

A Pobra: o cinema insírese tamén nas Xornadas de Homenaxe a Valle este xoves 13 e venres 14

• "Divinas palabras" proxéctase o xoves 13 de outubro
• "Tirano Banderas" pasarase o venres 14 de outubro
  

A Pobra, 11 de outubro de 2011. Con motivo da celebración da XIII edición de xornadas de homenaxe a Valle-Inclán na Pobra do Caramiñal, vanse celebrar dúas xornadas dedicadas á adaptación cinematográfica de dous dos títulos máis emblemáticos do escritor: “Divinas palabras” e “Tirano Banderas”, que serán proxectadas respectivamente os días 13 e 14 deste mes de outubro.

Para inaugurar esta sección dedicada ó cine, o xoves día 13 ás 20:00 horas estarán no auditorio do Museo Valle-Inclán acompañando ó alcalde da Pobra, Isaac Maceiras Rivas, o Director da CGAI, Guillermo Escrigas, e o Secretario Xeral de Medios da Xunta de Galicia, Alfonso Cabaleiro.

Antes, en Certo:

Xornadas Valle-Inclán: imaxes da presentación e da exposición

• A Pobra: homenaxe a Valle, todo outubro. Programa

Posted via email from Certo.gl, o xornal dixital de Barbanza e Noia

Ribeira: prevén catro pistas de pádel cubertas no complexo da Fieiteira que custarán preto de medio millón de euros

Ribeira, 11 de outubro de 2011.- O Concello de Ribeira anunciou hoxe que construirá no Complexo Polideportivo da Fieiteira un Centro de Pádel que contará con catro pistas cubertas. Así o contou o concelleiro de Deportes, Juan Luis Martínez Queiruga, quen resaltou que a ampla demanda existente entre a veciñanza (unhas 300 persoas son practicantes habituais do deporte do tenis no municipio) "foi clave á hora de decantarse por esta actuación, da que non existen iniciativas da mesma natureza na comarca". 

O centro terá unha superficie de 1.200 metros cadrados e estará situado nunha parcela a carón da piscina municipal e do campo de fútbol, que está ocupada actualmente por prazas de aparcamentos. Non obstante, Martínez Queiruga aclarou que a oferta de prazas de estacionamento non diminuirá xa que xunto coa execución deste proxecto contémplase a ampliación da área de estacionamento de vehículos. 

O feito de que o centro estea cuberto permitirá o uso da instalación durante todo o ano. Ademais de catro pistas acristaladas, a nova instalación contará con vestiarios e taquillas e dous halls de acceso: un dende o edificio da piscina e outro dende o exterior, de tal xeito que non se supedite o uso das pistas ao horario da piscina. 

Martínez Queiruga afirmou que xa se encargou o estudo para a realización dun prego de condicións que regulamenten as cláusulas administrativas e económicas para a construción do futuro Centro de Pádel. A modalidade contemplada para o desenvolvemento da actuación é a concesión de obra pública durante 35 anos.  

As tarifas rondarán os 12 ou 14 euros, un prezo baixo tendo en conta que se está arrendando en torno a 17 ou 20 euros, 

O Concello reservarase horas de uso propio tanto para a creación dunha escola deportiva como para a promoción de campionatos. 

O custe da actuación non está pechado, pero calcúlase que rondará os 400.000 ou 500.000 euros. 

Centro futuro de Raqueta

Segundo manifestou o edil ribeirense a intención do Executivo local é que máis a longo prazo a Fieiteira poida albergar un Centro de Raqueta, que inclúa tamén de pistas de tenis regulamentarias.

See the full gallery on Posterous

Posted via email from Certo.gl, o xornal dixital de Barbanza e Noia

Rianxo: o mestre do jazz Steve Brown estivo impartindo unha lección maxistral

Rianxo, 11 de outubro de 2011. O pasado sábado día 8 de outubro, a Escola de Música de Rianxo organizou, coa colaboración do Concello de Rianxo, unha Master Class co mestre Steve Brown, recoñecido músico americano. Con esta Master Class a Escola de Música de Rianxo da por iniciado o curso no recente Departamento de Jazz que ten como mestre a Alfredo Susavila. Asemade, os 18 alumnos que asistiron tiveron a ocasión de iniciarse no mundo da música moderna e da improvisación. A Master Class tivo como colofón un concerto no que participaron Steve Brown (guitarra), Risto Vuolanne (contrabaixo) e Roberto Somoza (Saxofón) e no que presentaron o seu novo cd: STANDARDS&BALLADS.

Pode que tamén lle interese:

• Rianxo: a Escola de Música programa o seu X Aniversario

See the full gallery on Posterous

Posted via email from Certo.gl, o xornal dixital de Barbanza e Noia

Noia: o Bng leva ao Parlamento unha proposición non de lei sobre os restos arqueolóxicos de Taramancos

Iniciativa parlamentar (achádegos en Taramancos).pdf Download this file

Noia, 11 de outubro de 2011. As deputadas Ana Luisa Bouza Santiago, Ana Pontón Mondelo e Teresa Táboas Valeiro, veñen de presentar unha proposición non de lei para o seu debate no pleno da Cámara Galega. 

A iniciativa parlamentar versa sobre a necesidade de revisar a actuación do Goberno galego no relativo aos restos arqueolóxicos aparecidos en Taramancos como consecuencia das obras de construción da estrada variante de poboación. 

A proposición, non de lei, lembra que o pasado día 30 de setembro, o Concello de Noia, debateu e aprobou por maioría absoluta unha moción que, a maiores de solicitar unha serie de actuacións por parte da Consellería de Medio Ambiente e Infraestructuras, entre elas a posibilidade de modificación do proxecto técnico desta obra pública a fin de preservar para o futuro os achádegos, tamén puña en cuestión todo o procedemento seguido pola Administración galega desde a data na que apareceron os restos mencionados. 

As parlamentarias instan ao Goberno galego a que se investigue a situación na que se atopa o xacemento de Taramancos, igualmente a que se informe ao Concello de Noia sobre a evolución das excavacións, e por último a revisar o proxecto técnico da estrada a fin de que os restos aparecidos fiquen á vista para a súa posterior posta en valor.

Relacionada:

Pleno de Noia: moción de urxencia polo arraso do castro de Taramancos

Pode que tamén lle interese:

Homenaxe: A Subela, en Santiago este sábado 15 de outubro, no de "Morgan"

Urbanismo en Noia: van derrubar o inmoble da rúa Laxe, nº 17

Posted via email from Certo.gl, o xornal dixital de Barbanza e Noia