Barbanza, por Certo

17.11.10

Noia: o Bng pregunta no Parlamento polo estado dos servizos sanitarios da comarca

Noia, 17 de novembro de 2010. O BNG de Muros e Noia, por medio das deputadas Ana Luísa Bouza e Ana Belén Pontón, vén de presentar unha pregunta parlamentaria onde se interesa polo estado dos servizos de atención sanitaria que lle afectan á poboación da comarca.

Na presentación da iniciativa a deputada Ana Luísa Bouza e o responsable comarcal, Manuel González, indicaron que a Consellería de Sanidade "non prevé ningunha acción específica de mellora dos centros de atención primaria existentes nos seis concellos da comarca, nin tampouco no Punto de Atención Continuada (PAC)". Do mesmo xeito, denunciaron a paralización por parte do actual goberno do Plan de Mellora de Atención Primaria que lanzara o anterior goberno e que tiña como obxectivo incrementar os medios humanos e materiais nos centros de atención primaria e dese xeito evitar o desvío de casos aos centros de atención especializada.

Tamén lamentaron o incremento nas listas de agarda no Centro Hospitalario Universitario de Santiago (CHUS) tanto para atención especializada como para operacións cirúrxicas. "Non podemos esquecer que os veciños de todos os concellos da comarca, agás Porto do Son que depende do hospital da Barbanza, se ven afectados polo empeoramento nos servizos do CHUS", indicou Manuel González.
Así, a media de espera para cirurxia situase neste centro nos 96 días, 11 máis que en 2009 sendo especialmente grave nalgúns casos como en Pediatría (136,5 días) ou en Traumatoloxía (100,3 días). A agarda media para a atención especializada sitúase tamén nos 96 días.

Centro de saúde de Noia

Culpan á "política privatizadora do PP"

Ana Luísa Bouza indicou que a presente situación "é motivada polas políticas privatizadoras e a nula capacidade de xestión do goberno do Sr. Feijoo, que se preocupa máis en facer propaganda que en solventar os problemas cidadáns".

Finalmente, os representantes do BNG instaron á poboación da comarca a manifestarse este domingo 21 en Santiago de Compostela en defensa da Sanidade Pública e contra o que eles denominan "a política privatizadora do Goberno do PP".

Posted via email from Certo.gl, o xornal dixital de Barbanza e Noia

Ribeira: a celebración do Día Internacional dos Dereitos dos Nenos xuntará a un milleiro de rapaces este venres

Ribeira, 17 de novembro de 2010. Arredor dun millar de nenos e nenas de Ribeira van participar este venres, día 19 de novembro, nos actos conmemorativos do Día Internacional dos Dereitos da Infancia, segundo desvelou este mediodía a primeira tenente de alcalde, María Dolores Elorduy Callón.

A edil municipal estivo acompañada durante a celebración da actividade das máximas responsables en Ribeira de tres das ONGs que colaboran na iniciativa: Cruz Ribadulla, presidenta de Unicef Riveira; Ángeles Cores, presidenta da Cruz Bermella de Ribeira, e Ramona Pérez, presidenta de Mans Unidas.

A acción está promovida polas Concellerías de Xuventude e Educación (os seus titulares respectivos, Vicente García e Xoana Ermitas, non puideron intervir na presentación por encontrarse fóra do concello por tarefas municipais). Ademais das tres ONGs citadas, tamén colaboran outras catro organizacións non gubernamentais (Intermón Oxfam, Cáritas Parroquial, Dignidade Ribeira e Médicos Sen Fronteiras), as asociacións Ámbar e Amicos e distintos centros de Ensino Secundario do municipio.

Sensibilización social

María Dolores Elorduy declarou que con esta actividade quérese destacar o traballo feito por cada centro de ensino e ocupacional en canto á divulgación da Declaración dos Dereitos dos Nenos e das Nenas, así como “sensibilizar á sociedade en xeral respecto a este tema transcendental para o futuro”.

Cruz Ribadulla afirmou que con esta acción preténdese “recordar a todo o mundo que os problemas da infancia existen e que hai moitos nenos que teñen moitas dificultades para sobrevivir". Así mesmo, manifestou que “a infancia é o noso recurso máis preciado”. Nesta idea redundou Ramona Pérez, quen expresou o seu desexo de que “a xente se mentalice de que hai que traballar no futuro dos nenos". Pola súa banda, Ángeles Cores declarou que con esta celebración “logramos que a xente maior se pregunte o motivo da mesma e se preocupe así dos dereitos dos nenos”.

Programa

Os actos darán comezo en torno ás 11.35 horas no Palco de Música do Malecón, onde se darán cita os nenos e nenas que van participar, os cales, unha vez concentrados, camiñarán rumbo á praza do Concello portando unhas pancartas conmemorativas de cada un dos dereitos que se queren promover e nos que estiveron traballando nas últimas semanas: igualdade, protección, identidade, benestar, atención á diversidade funcional, amor e comprensión, educación e xogo, preferencia, non explotación e fraternidade.

Dez minutos despois, procederase á lectura dos dereitos enumerados por parte dun representante de cada centro educativo e ocupacional participantes e dunha ONG. Acto seguido, o alcalde Xosé Luis Torres lerá un manifesto elaborado para a ocasión.

Acompañamento do grupo Entrelíneas

A continuación, todos os presentes cantarán unha canción solidaria acompañados do grupo de música local Entrelíneas, gañador o pasado verán do Primeiro Concurso de Grupos de Música Local do Concello. Arredor das 12.45 horas porase punto final á actividade e os alumnos regresarán aos seus centros.

Finalmente, a primeira tenente de alcalde formulou o seu desexo de que esta vez a meteoroloxía acompañe o acto e non impida o desenvolvemento do mesmo, tal e como aconteceu o ano pasado.

Posted via email from Certo.gl, o xornal dixital de Barbanza e Noia

Dodro: traballos de limpeza nas brañas de Laíño, no espazo Rede Natura

Dodro, 17 de novembro de 2010. A concellería de Desenvolvemento Local, dirixida polo nacionalista Guillermo González Baleirón, iniciou o traballo de limpeza nos terreos do espazo Rede Natura.

Este traballo, realizado ao abeiro dunha subvención da Xunta de Galicia solicitada para tal fin, consiste na limpeza dos camiños, cunetas e na preservación dos tubos de conducción das drenaxes existentes nas Brañas, xa que a situación actual é de obturación. Coa limpeza quérese conseguir unha comunicación ininterrumpida do caudal de agua para paliar as consecuencias propias do inverno nunha zona que de por si tradicionalmente se anegaba, pero que o fai de xeito máis pronunciado dende que se construeu a autovía AG-11 ou do Barbanza.

Posted via email from Certo.gl, o xornal dixital de Barbanza e Noia

Dodro: 45 poemarios compiten no premio de poesía "Eusebio Lorenzo Baleirón", que revelou hoxe o xurado

Imaxe da entrega o pasado ano a Daniel Costas polo seu poemario "Conservas"

Dodro, 17 de novembro de 2010. A Concellaría de Cultura de Dodro, dirixida polo novo concelleiro do BNG Abel Tarrío, manifesta a súa "satisfacción polo éxito da convocatoria da XXIIIª edición do Premio de Poesía Eusebio Lorenzo Baleirón, correspondente a este ano 2010".
O pasado sábado, día 13 de novembro, remataba o prazo de recepción para poemarios inéditos e orixinais que nesta edición ampliou notablemente o seu eco entre as/os creadoras/es galegas/os, "co cal reafírmase de novo Dodro como un lugar dos máis sobranceiros do Parnaso galego. En concreto o Concello rexistrou entrada de 45 obras; todas elas pasarán agora a seren valoradas polo xurado para obteren o nome da obra gañadora, un resultado que xa aventuramos laborioso e difícil", explica o Concello.

No solemne acto de entrega do sábado 11 de decembro non faltará a música

Xurado desta edición

Conforme estipula a base oitava do premio Eusebio Lorenzo Baleirón, chegou o momento de dar a coñecer ao xurado desta edición tras de rematar o prazo de admisión. Está composto por Daniel Costas, gañador da última edición; o tamén poeta Modesto Fraga Moure; a profesora de Literatura, poeta e tradutora de Eusebio Lorenzo
Baleirón, Ánxeles Penas e Dolores Vilavedra, profesora da USC e crítica literaria de longa traxectoria.

A decisión do xurado farase pública o día 11 de decembro, ao que seguirá o acto de entrega do Premio á obra galardoada días despois nun acto revestido da maior relevancia cultural que está xa está a preparar, como todos os anos, o Concello de Dodro. O concelleiro nacionalista quere agradecer a todas as persoas que axudan a difundir este galardón e, moi especialmente ás/aos participantes, "que nos dan o privilexio de coñecer a súa obra inédita e poder colaborar no sostemento e promoción da lingua do noso País, neste momento tan delicado no que hai quen pon en duda a súa valía, un produto intelectual universal e froito da sensibilidade dos nosos artistas, que nos axuda a todas e todos a vivir nun mundo máis rico". Abel Tarrío tamén agradece a colaboración da Deputación da Coruña, que financia a organización deste premio.

Gañadores do Eusebio Lorenzo Baleirón ata o 2009

2009: Daniel Costas, Conservas
2008: Xabier Xil Xardón, Cando menos, a derrota
2007: Nieves Soutelo, Código poético
2006: Rafa Villar, Escoración dos días
2005: Mariña Pérez Rei, Fanerógama
2004: Lupe Gómez, Azul estranxeira
2003: María Comesaña Besteiros, Zoonose
2002: Eduardo Estévez, Caderno apócrifo da pequena defunta
2001: Xosé Lois Rúa, O tránsito da auga
2000: Carlos Penela, Acaso o inverno
1999: Emma Pedreira, Grimorio
1998: Estevo Creus, Teoría do lugar
1997: Emma Couceiro, As entrañas horas
1996: Isidro Novo, Dende unha nada núa
1995: Xosé Miranda, Amantes e viaxeiros
1994: Xosé M. Millán Picouto, As palabras no espello
1993: Xabier Cordal, Fruto do teixo
1992: Palmira González Boullosa, Asoladamente, o teu nome
1991: Helena Villar Janeiro, Nas hedras da clepsidra
1990: Xavier Rodríguez Barrio, Alborada no muro
1989: Gonzalo Navaza, Fábrica íntima
1988: Xosé López Gómez, O matiz esmeralda na sombra

Relacionada:
Pediron o Día das Letras Galegas de 2011 para Eusebio Lorenzo Baleirón

Posted via email from Certo.gl, o xornal dixital de Barbanza e Noia

Boiro: o Concello abre prazos para solicitar bolsas para deportistas e axudas a deporte federado

Boiro, 17 de novembro de 2010. O Concello de Boiro vén de aprobar na Xunta de Goberno Local celebrada onte, día 16 de novembro, as “Bases específicas da convocatoria de axudas ao deporte federado e de axudas para o fomento de actividades deportivas e outras actividades físicas de tempo libre”, así como as “Bases específicas da convocatoria 2010 de bolsas a deportistas”. No primeiro dos programas, o seu obxectivo básico é “apoiar ás entidades deportivas en ánimo de lucro na realización de actividades deportivas e de tempo libre”, así como respaldar a participación dos clubes federados en ligas e competicións oficiais, mentres que o segundo está destinado a apoiar a deportistas de talento, tanto na súa preparación e práctica como na participación en eventos deportivos.

O programa de axudas ao deporte federado e fomento de actividades deportivas está dotado con 51.500 euros, e o de bolsas a deportistas, con 4.900 euros; neste último caso a axuda oscila entre 150 e 350 euros, en función do nivel deportivo do solicitante.

En ambos casos, os solicitantes teñen de prazo até o 26 de novembro para formular as correspondentes solicitudes, que se poden descargar a continuación.

Download now or preview on posterous

BASES CONVOCATORIA AXUDAS O DEPORTE FEDERADO E ACTIVIDADES DEPORTIVAS.pdf (104 KB)

Download now or preview on posterous

BOLSAS A DEPORTISTAS 2010.doc (40 KB)

Download now or preview on posterous

MODELOS_NORMALIZADOS BOLSAS DEPORTISTAS 2010.doc (85 KB)

Download now or preview on posterous

MODELOS SOLICITUDE NORMALIZADOS DEPORTE FEDERADO.pdf (168 KB)

Posted via email from Certo.gl, o xornal dixital de Barbanza e Noia

16.11.10

Política: os socialistas engaden novas irregularidades ás xa numerosas detectadas nas oposicións do Sergas

Lage esixe á Xunta que investigue as oposicións do Sergas pola sospeita de máis irregularidades. Pregunta “se é unha casualidade ou un milagre” que unha familiar directa do opositor que se corrixiu o seu propio exame acadara a mellor nota nas probas ás que se presentou

Santiago de Compostela, 16 de novembro de 10. O portavoz da Área Institucional do Grupo Parlamentario dos Socialistas de Galicia, José Manuel Lage Tuñas, esixiu hoxe á Xunta de Galicia que investigue a fondo as probas selectivas do Sergas correspondentes á Oferta Pública de Emprego 2008/2009 “pola existencia de sospeitas de máis irregularidades”.

O parlamentario socialista presentou unha Proposición non de Lei na que esixe ao Goberno galego que cumpra coas recomendacións recollidas no informe elaborado polo Valedor do Pobo, que evidencia a existencia de irregularidades. Así, reclama “as avaliacións estatísticas que permitan coñecer as casualidades existentes polas que sinaladas persoas obtiveron as mellores puntuacións” nas devanditas probas.

Lage Tuñas pregunta “se é unha casualidade ou un milagre” a noticia coñecida hoxe na que se destapa que unha familiar directa do opositor que se corrixiu o seu propio exame acadara a mellor nota nas probas ás que se presentou. Ademais, engadiu, “á vista das denuncias que seguimos recibindo sobre as oposicións do Sergas pedimos que se estenda a investigación á totalidade das categorías nas que se ofertaron prazas”.

O viceportavoz do Grupo Parlamentario dos Socialistas de Galicia instou ao presidente da Xunta a “adoptar decisións inmediatas” polos “graves feitos descubertos” nestas oposicións asumindo as responsabilidades políticas derivadas da situación producida nestes procesos selectivos. Denunciou que Feijóo “está baltarizando o Sergas ao permitir irregularidades que outorgan unha situación de clara vantaxe a determinados opositores”.

Lembrou que Feijóo “a día de hoxe aínda non se pronunciou para explicar si avala a xestión das oposicións nas que un opositor corrixiu o seu propio exame”. Lembrou que, tal e como conclúen o Valedor e mesmo o informe interno da Consellería de Presidencia, os exames das oposicións do Sergas imprimíronse nunha sala sen control nin vixilancia, e os exames pasaron por varias mans nun pen-drive “rompendo a cadea de custodia”.

O parlamentario socialista advirte de que “acrecéntanse as dúbidas sobre a existencia de máis beneficiarios das irregularidades e ausencias de controis nos procesos previos á realización dos exames en diferentes categorías”.

Por este motivo reclamou “a extensión da investigación aberta a instancias do grupo parlamentario socialista e do Valedor do Pobo ao conxunto das categorías incluídas na Oferta Pública de Emprego do ano 2008 / 09 debida a existencia de numerosas denuncias onde se poñen de manifesto serias sospeitas sobre posibles novos beneficiarios das irregularidades xa denunciadas”.

Antes publicamos todo isto sobre o mesmo asunto

Posted via email from Certo.gl, o xornal dixital de Barbanza e Noia

Ribeira: o venres 19 preséntase "O Grupo. 60 anos no corazón de Ribeira", libro do profesor Luís Teira

Será ás oito da tarde no conservatorio

Antes publicamos:

'O Grupo' celebra o seu 60 aniversario, aquí

Galería de fotos da exposición en 'O Grupo', aquí

Posted via email from Certo.gl, o xornal dixital de Barbanza e Noia

Boiro: o cineforum de Ámbar en Acción! incideu sobre a promoción da autonomía persoal

Boiro, 16 de novembro de 2010. O cineforum "Nada sobre nós sen nós", dentro do festival audiovisual Acción!, tivo lugar o 13 de novembro no Espazo Leña Verde do Concello de Boiro e colaboraron nel o Departamento de Cultura deste concello, o Foro de Vida Independente e Lapepa Producións.

"A volar" está producido por Lapepa: http://www.lapepaproducciones.com

A Asociación Ámbar organizou este cineforum que, na súa primeira edición, proxectou o documental 'A volar', que recolle as historias de vida de catro persoas con diversidade funcional, co fin de incidir na importancia da asistencia persoal como ferramenta social para a cidadanía e as novas perspectivas sobre a autonomía persoal e a vida independente dentro da comunidade, entre outros aspectos.

Tamén se proxectou a curtametraxe 'O pantallazo', que recolle a intervención dun grupo de cidadáns manifestándose sobre “os efectos da burocracia infinita sobre as vidas das persoas”. Durante a presentación, a presidenta de Ámbar, Milagres Rey, dixo que as persoas con diversidade funcional e os vellos “poden e deben vivir incluídos dentro dos nosos pobos, para o que precisan de apoios adecuados ás súas necesidades” e explicou que o obxectivo do cineforum é explicar e reflexionar sobre os instrumentos que mellor se poden utilizar na nosa comarca para “que ninguén se vexa apartado da vida na comunidade”.

Na actividade estiveron presentes os alcaldes de Boiro e Pobra, Xosé Deira e Isaac Maceiras, o concelleiro de cultura de Boiro, Xerardo Piñeiro, e as concelleiras de Asuntos Sociais, Natalia Laíño e Balbina Lojo. Entre os asistentes había diversas persoas que acudiron de distintos puntos da comarca barbancesa e de Pontevedra.

Tra-las proxeccións tivo lugar un interesante e vivo coloquio, no que tanto autoridades como público participaron con entusiasmo, percorrendo diversos temas relacionados cos contidos da mostra: exploráronse dende os anecdotarios persoais ata as políticas públicas e os recursos destinados á promoción da autonomía en diversos contextos e ámbitos, accesibilidade, vivenda, transporte e demais. O cineforum prolongouse ata as nove da noite e dende Ámbar califícano como un "éxito".

Posted via email from Certo.gl, o xornal dixital de Barbanza e Noia

Noia: 19 vivendas protexidas de promoción privada en Castro do Santo

Poden optar ás mesmas os solicitantes que estiveran escritos no Rexistro de Demandantes a data de oito de novembro. As solicitudes deberán presentarse ata o tres de decembro.

Noia, 16 de novembro de 2010. O Instituto Galego da Vivenda e Solo (IGVS) iniciou o procedemento para a adxudicación de 247 vivendas protexidas de promoción privada construídas nos concellos da Coruña, Fene, Mugardos, Ames, Noia, Ordes e Oroso, segundo o establecido na normativa do Rexistro Único de Demandantes de Vivenda de Galicia. En Noia serán dezanove as vivendas de réxime xeral adxudicadas. Están emprazadas na rúa Castro do Santo e o seu remate prevese para outubro de 2012.

Poden optar á adxudicación de ditas vivendas os solicitantes que estiveran inscritos no Rexistro de Demandantes na data do oito de novembro en que o Xefe Territorial da Coruña da Consellería de Medio Ambiente, Territorio e Infraestruturas ditou as resolucións de inicio do procedemento de adxudicación das devanditas vivendas. Os solicitantes deberán estar inscritos no réxime, modalidade e localidade da promoción á que se opte.

As solicitudes deberán presentarse ata o día tres de decembro en calquera rexistro público ou portelo único, dirixidas á xefatura provincial do IGVS na Coruña, empregando o modelo de solicitude que se pode atopar na web do IGVS:
(http://igvs.xunta.es/web/actuamos/celebracions-sorteos-rexistro-demandantes).

Posted via email from Certo.gl, o xornal dixital de Barbanza e Noia

Rianxo: Antón Alcalde estivo na presentación en Santiago do IV Certame Galego de Bandas de Música

Rianxo, 16 de novembro de 2010. Ás 12.00 horas desta mañá tiña lugar no Concello de Santiago de Compostela a presentación do IV Certame Galego de Bandas de Música, que se celebra esta fin de semana vindeira, e da edición das partituras premiadas no II Concurso de Composición. O acto contou coa intervención da concelleira de Cultura e Centros Socioculturais do Concello de Santiago de Compostela, Socorro García Conde, do presidente da Federación Galega de Bandas de Música Populares, Rubén Souto Santos, e de dous dos premiados no II Concurso de Composición: o rianxeiro Antón Alcalde Rodríguez (premiado na Sección Banda de Música con Pórtico e na Sección Sinfónica con Marea Negra) e Juan Eiras (finalista na Seccion Banda de Música con Auga Levada) cuxas obras serán obrigadas para a presente edición do Certame Galego.

Socorro García Conde salientou o traballo da FGBMP e a labor que se realiza dende a propia Federación para con a xuventude e loou o traballo diario que realizan as bandas de música populares para acadar o alto nivel no que se sitúan na actualidade. Pola súa parte, Rubén Souto Santos, insistíu tamén na importancia do proxecto e dos seus compoñentes: na actualidade o 78% dos 4500 músicos que aglutina a FGBMP non supera os 30 anos de idade e algo mais do 35% do total non chega á maioría de idade. Así mesmo, fixo fincapé no feito de que o Certame Galego coloca ás bandas de música galegas e aos seus compositores no contexto universal, de feito, a canle en youtube da FGBMP suma xa máis de 600.000 reproducións.

Logo de explicar o funcionamento do Certame (consultar toda a información), Rubén Souto Santos deulle a palabra a Antón Alcalde e a Juan Eiras, ámbolos dous premiados na segunda edición do Concurso de Composición do que se presentaba a edición en papel nun pack que recolle as cinco obras galardoadas e un cd coa gravación da estrea por parte da Banda Sinfónica da FGBMP, que agradeceron o premio e recalcaron a importancia da continuidade co Concurso por representar unha oportunidade única para os compositores galegos.

O certame terá lugar esta fin de semana no Auditorio de Galicia, en Santiago