Ribeira: comezaron as obras na rúa Pedra da Aiga en Palmeira

 

Palmeira, 11 de febreiro de 2013.- O Concello informa de que xa está en marcha a obra para renovar os servizos da rúa de Pedra da Aiga, na parroquia de Palmeira: unha actuación cuxo importe ascende a 44.740,88 euros e está sendo executada pola empresa Construcciones Pazo de Axeitos, S.L. 

A rúa non dispoñía de rede de drenaxe de augas pluviais, razón pola cal en épocas de chuvia era frecuente que se producisen problemas de acumulación en fincas colindantes. O pavimento actual era de formigón.

Pluviais, auga e saneamento

O proxecto elaborado prevé a construción dunha rede para drenaxe de pluviais, ademais da renovación dos servizos de auga potable e saneamento.

 

A tal efecto, será colocada unha tubaxe de polietileno de alta densidade de 90 milímetros de diámetro para o abastecemento de auga potable e outra de PVC corrugado de 315 milímetros para pluviais. En canto a saneamento, instalarase unha tubaxe de PVC liso de 315 milímetros.

 

Pavimentación

Unha vez rematadas estas accións, a rúa será pavimentada con adoquín de formigón gris combinado con outro de cor vermella, ambos con dimensións de 20x10x8 centímetros.

A rúa contará coa pendente lonxitudinal e transversal suficiente para que a auga superficial sexa conducida ata as arquetas sumidoiro proxectadas. Na liña de pluviais disporanse arquetas cada 20 ou 25 metros.

Pode que tamén lle interese:

• Ribeira: este martes, Desfile de Murgas e Comparsas. Trece compiten polos premios

• Arte: Manuel Moreno, Hugo Besard, Tomasz Winiarski, Deborah Chapman e Ana Cambeiro, premios "Atlante" de gravado

• Ribeira: do 15 ao 17 de marzo, viaxe á neve

• Ribeira: Arrecó opta pola neve en Manzaneda, o 23 e 24 de febreiro

• Stop Desahucios:  Servizos Sociais de Ribeira tamén colabora coa plataforma para axudar ás 17 familias afectadas na cidade

• Ribeira: compiten 41 empresas para amañar o paseo de Coroso por 600.000 euros

See the full gallery on Posterous

Posted via email from Certo.gl, o xornal dixital de Barbanza e Noia

Dodro: lista de premiados no certame de disfraces de Entroido

Dodro, 11 de febreiro de 2013. O pasado sábado, 9 de febreiro, celebrouse en Dodro o Concurso de Disfraces con gran afluencia de veciños e de disfraces. A entrega de premios estivo a cargo do alcalde Valentin Alfonsín e a concelleira de Cultura, Voluntariado e Asociacionismo, Cristina Codesido.

Durante toda a xornada todos poideron disfrutar de doces típicos do entroido.

Os premiados foron: 

Categoría individual infantil (0-6 anos): Premio lote sorpresa

Caperuchiña vermella: Saleta Rivo Bugallo

Unha oruga moi larpeira: Antía Otero Blanco

 

Categoría individual infantil (7-12 anos): Premio entradas de cine 3D

Vampiresa: Marta Le Perez Boga

Bruxa: Carolina Calvo Perez

 

Categoría individual xuvenil – Deserto

 

Categoría individual adulto: Fin de semana en Casa Rural

Circo ao revés 1 e circo ao revés 2: Mª Isabel Ramos Ferro e parella

Categoría grupal xuvenil: Xornada na boleira con merenda

Barbies: Alba Baleirón, Ángela Castro e Paula Calvo

Categoría grupal adulto: Cea en restaurante

Contos de Lecras: Rita Bugallo, Cristina Blanco, Raquel Tubío e Mónica Castro

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: os 25 participantes no obradoiro de cociña e repostería entroideira recibiron os seus diplomas

Relacionada:

• Ribeira: este martes, Desfile de Murgas e Comparsas. Trece compiten polos premios

Ribeira, 11 de febreiro de 2013. Un total de 23 mulleres e 2 homes tiveron ocasión de participar durante a semana pasada (do 5 ao 8 de febreiro) no Obradoiro de Cociña e Repostería de Entroido que organizou o Concello dentro da programación destas festas.

 

Ao concluír o curso, a concelleira de Cultura, Elvira Pisos Arnoso, entregou cadanseu diploma aos 25 asistentes á acción formativa, así como á profesora, Ana Domínguez Chouza.

Entre as especialidades aprendidas polos alumnos e alumnas, figuraron pratos tan típicos como  cocido, lacón con grelos, resóns, bolos do pote ou carne ao caldeiro, ademais de bolicos doces en prebe de viño tinto quente, rosquillas, filloas, orellas, flores, tarta de queixo, touciño de ceo, cabelo de anxo, tronco de chocolate, flan biscoitado, etc

Posted via email from Certo.gl, o xornal dixital de Barbanza e Noia

Divulgación científica: Lira acolleu o primeiro Entruido Científico da súa historia

• Nunha especie de serendipia, o Punto Científico que organizou a impronunciable Asociación Galega de Comunicación de Cultura Científica e Tecnolóxica (AGC CCT) cadrou co desembarco romano do Entruido de Lira e produciuse o que se pode considerar Primeiro Entruido Científico da historia liracha
• O astrónomo Borja Tosar con “Postal planetaria dende Marte”, o microbiólogo Esteban Fernández con “De camping coas bacterias”, o neurocientífico Casto Rivadulla con “Ata canto sabes contar?”, o químico Manuel Vicente con “O home apático”, a científica mariña Luisa Martínez con “Entroido Mariño” e o físico Pío González con “Biomateriais” misturáronse con Cleopatra e Julio César coas súas tropas, así como os resistentes locais, os da Torre dos Mouros, nunha tarde surrealista moi divertida e educativa
  

Cartel do Entruido de Lira deste ano

Lira, Carnota, Costa da Morte, 10 de febreiro de 2013. Van tardar tempo en esquecer os lirachos a tarde de onte, na que cadrou o seu primeiro Entruido Científico. O que sucedeu, inda que para moitos pasara desapercibido, é complicado de contar. Tanto que imos botar man de películas surrealistas patrias como "Amanece que no es poco" e do clásico dos irmáns Wachoski, "Matrix", aproveitando que un dos científicos que alí se achegaron ousou levar esta "chupa" pola mañá, na súa visita á Torre dos Mouros. Mais xa saben: "por desgraza non se pode explicar o que é Matrix, tes que velo cos teus propios ollos". O mesmo que o que alí, en Lira, aconteceu.

Esteban Fernández, microbiólogo, con Xurxo Ayán, arqueólogo, no outeiro da Torre dos Mouros

Pola mañá, na visita ao xacemento das incógnitas, a Torre dos Mouros, xa se viña falando: "Hai que ter coidado pola tarde, que o Punto Científico vai cadrar á mesma hora que o Entruido de Lira". Mais non se fixo demasiado caso: agardábase conxuntar todo sen problemas. A mítica frase de "Amanece que no es poco" ía camiño de ser unha profesía autocumprida: "Eu podería ser un lenda, ou unha epopeia se nos xuntamos varios". E alí, na lonxa de Lira, se xuntaron.

Os resistentes galos e lirachos baixaban a defender o porto de Lira. As condicións etílicas foron máis preocupantes que as metereolóxicas

Chegaron antes os científicos que os entroideiros, e intentaron levar a voz cantante. Como en Matrix, posuído pola dúbida sobre se empezar ou non, ("É a pregunta a que nos da a forza, é a dúbida a que nos trouxo aquí"), o microbiólogo Esteban Martínez, disfrazado de oronda bacteria, aleccionou aos lirachos (aos que primeiro chamou lirenses e logo lirotas, ata que chegou o alcalde Moncho Canedo a aclararlle o xentilicio). Entre reverberacións do micrófono, Esteban Bacterio berrou: "Estamos na era postantibióticaaaaa". Estamos seguros de que máis dun liracho presente pensou, como en "Amanece que no es poco", "Me cagho no misterio!". 

Esteban Fernández, vestido de bacteria, difundindo a era postantibiótica

Mais tivo pouco éxito o chamado do microbiólogo disfrazado. Naqueles intres a dorna xeiteira que lle roubaron os romanos aos lirachos chegaba para facer o desembarco, coa fermosísima Cleopatra a bordo. Había algún galo que se pasara ao inimigo, porque axudou mesmo á lexión romana a botar o pé a terra.

[[posterous-content:DJojvHygjtHDyEuluJbz]]

Nestes intres do desembarco producíase o diálogo de "Amanece que no es poco":

.- E vostedes, que fan aquí?

.- Estamos invadindo o seu pobo...

Unha vez feito o desembarco, Cleopatra tivo que dirixir unhas verbas ao pobo, tranquilizándoos sobre a invasión e invitándoos ao goce das festas do Entruido liracho. A famosa exipcia, que se parecía moito a unha beleza local, ben puido dicir entón como Neo en Matrix:

"Sei que estades aí, percibo a vosa presencia. Sei que tedes medo. Temédesnos a nós. Temedes o cambio. Eu non coñezo o futuro. Non vin para dicirvos como vai acabar todo isto... ao contrario". Mais o futuro inmediato estaba escrito: tocaba a queima do Meco:

[[posterous-content:HIevJvABtylhrHprpwtu]]

Logo dunha pequena charla do Obélix travestido á cidadanía, comezou o espectáculo científico. Por fin Esteban Fernández despregou a súa tenda-célula e puido explicar á concorrencia por que as bacterias podían ser eliminadas cos antibióticos pero os virus non. Axudado polo actor Vicente de Souza, que lle termou do micro inarámico que se entrecortaba, o microbiólogo amosou de xeito moi gráfico como funcionan os medicamentos no noso corpo.

[[posterous-content:ttEjlgmlvtBkiqgJsrHJ]]
[[posterous-content:gsIgtsrdykkCzFDlfHjg]]
"De camping coas bacterias", titulouse a charla divulgativa de Esteban Fernández

Logo do esforzo para facerse entender, o Profesor Bacterio deu paso a Casto Rivadulla, neurocientífico da Universidade da Coruña, que se puxo a explicar o cerebro dos matemáticos cunha réplica de plástico na man. Polo visto, de tanto traballar con números, os matemáticos engrosan a parte do seu cerebro na que se localiza esta función. Como en "Amanece que no es poco", algún dos presentes pensamos que a nós "tamén nos gustaría ser intelectuais, total, como non temos nada que perder...".  

[[posterous-content:hmFFElgHnFxchCJGIyEo]]
[[posterous-content:phzgeaEAgoDqyckcDnbE]]
Casto Rivadulla engaiolou ao mismísimo César coas súas explicacións sobre o cerebro

Namentres Vicente de Souza facía de mestre de cerimonias cos outros científicos, ás caladiñas, a científica mariña Luisa Martínez xa montara o seu tenderete titulado "Entroido mariño" no que lles ía explicando aos nenos os habitantes do mar e os invitaba a identificalos e colorealos nuns debuxos a tal efecto. Este obradoiro sempre é un éxito entre os máis pequenos. Tanto, que un dos nenos disfrazados de romano lle dixo a Luisa: "A ver se vides para o ano, que estas actividades non se fan por aquí".

[[posterous-content:ACGiJxGdJkfEzcriucoB]]
[[posterous-content:EcaFtzGHezIzpeAnuEED]]
Luisa Martínez veu dende Vigo para facer o obradoiro "Entroido Mariño"

Logo tocoulle o turno ao químico Manuel Vicente, que moitos coñecerán polo programa na Radio Galega "EfervesCiencia", e que é o director da incitable Asociación Galega de Comunicación de Cultura Científica e Tecnolóxica (AGC CCT). Pertrechado cun gorro ruso, Vicente, en plan "Que quería yo hablarles de Mendeleiev!", intentou explicarlle ao público quen era o químico Dmitri Mendeleiev, do que chegou a contar incluso a súa vida amorosa. Moita xente quedouse, parafraseando "Amanece que no es poco", con que este home dáballe ás mulleres "unhas prestacións sexuais moi boas". 

[[posterous-content:mJqrkpJkuCykqssAjqae]]
Manuel Vicente contando lercheos sobre o famosísimo químico ruso Dmitri Mendeleiev

Por se o surrealismo non chegara bastante lonxe, na seguinte charla, a do astrónomo Borja Tosar, unha nube tóxica improvisada serviulle de telón para presentar o planeta Marte. A nube fora provocada polo Obélix travestido, do que se rumorea que queimou o seu menhir de porespán para liberarse de carga e ir ligar coas romanas. O caso é que, como ven nas imaxes, unha morea de dioxinas amenizou a charla de Tosar, que lles quixo vender aos lirachos unha viaxe a Marte bastante movida.

[[posterous-content:pByaFiFgbJuvGbajBizC]]
[[posterous-content:HFppGJgHvFFilccoyHwh]]
A bo seguro que o suicida de "Amanece que nos poco" diría ao ver estas imaxes que "Un día vai haber un accidente".

Foi no medio da charla do astrónomo e da nube negra cando moitos entruideiros aplicaron o de "Amanece que no es poco" (yo no aguanto este sin dios) e a esplanada da lonxa liracha quedou medio baleira. Os últimos resistentes quedaron con Pío González, físico da Universidade de Vigo, que falou de biomateriais, ou do que imos levar dentro do noso corpo co paso dos anos, cando se nos creben os ósos sobre todo. Materiais moi caros, por certo, e que cada vez saen de máis fontes naturais, como árbores ou dentes de tiburón.

[[posterous-content:uJaDBHEvqutcktdCGoHi]]

Pío González con Vicente de Souza falando dos ultimísimos biomateriais descubertos

O actor Miguel de Lira (ríndose, non sabemos se co Entruido ou do Punto Científico) tamén se achegou ata a esplanada da lonxa

E así rematou o Primeiro Entruido Científico de Lira. En Matrix dicíalle Trinity a Neo: "Isto nunca se fixera". E Neo respostou: "Por iso é que vai funcionar". E cremos que funcionou, inda que, como a vida de Neo segundo o Arquitecto, sexa "o produto eventual dunha anomalía que a pesares de denodados esforzos non fomos capaces de suprimir desta harmonía de precisión matemática".
 

Posted via email from Certo.gl, o xornal dixital de Barbanza e Noia

Divulgación arqueolóxica: a Torre dos Mouros, en Lira, un exemplo de como interesar á comunidade local e atraer visitantes

O profesor Gago explica unha das estruturas atopadas na Torre dos Mouros

Lira, Carnota, 10 de febreiro de 2013. Onte, sábado 9 de febreiro, tivo lugar en Lira unha nova visita guiada á escavación da Torre dos Mouros, un estrano xacemento que foi escavado o pasado verán. Inda que nun principio os guías ían ser, alternativamente, o profesor de Xornalismo Manuel Gago e o arqueólogo Xurxo Ayán, ao final só falou o primeiro, coa aprobación do segundo, que ía para a ocasión disfrazado de ditador. A coincidencia coas datas do Entroido engadiu unha nota lúdica, ao tempo que surrealista, á visita, coa enigmática presencia dun personaxe cun gabán saído da película "Matrix".

Este enigmático individuo resultou ser Esteban Fernández, microbiólogo

Na visita tamén houbo nenos, que o pasaron xenial choutando polas penas, alleos á explicación sesuda de Gago

O outeiro da Torre dos Mouros, como explicou o divulgador Manuel Gago, segue a ser una atipicidade entre os xacementos arqueolóxicos galegos. É o dobre de grande que un castro normal (ten dúas hectáreas de extensión), non parece ter as características dos habituais poboados da segunda Idade de Ferro e tampouco se corresponde a súa estrutura coa dun castelo medieval. O que quedou claro, logo da tremenda roza de toxo e xestas á que se adicaron os numerosos voluntarios que colaboraron no proxecto, e despois do levantamento de muros e cachotería caída, é que o esforzo construtivo realizado para que en teoría non vivise permanentemente alguén alí segue a ser unha incógnita.

Entre os asistentes estivo o concelleiro de Cultura e Turismo de Carnota, Iván Franco

O profesor Gago ocupouse de poñer en referencia este xacemento coa abondosa presencia de xacementos, algúns únicos, en Carnota e arredores. Así, a visita serviu para abrir o abano de posibles lugares visitables, e incluso algúns que habería que escavar no futuro para ter un maior coñecemento do noso pasado máis remoto.

Álbum en Flickr desta visita:

Se ten curiosidade sobre este xacemento de terras lirachas pode visitar a web http://torredosmouros.net 

Posted via email from Certo.gl, o xornal dixital de Barbanza e Noia

Grumires: a Xunta desbota as protestas de Noia e segue adiante coa nova rede de emerxencias

• Será o Grumir de Brión e non o de Muros o que se faga cargo de Noia
• A Xunta segue a soster que a nova distribución é "máis racional" cando en Muros non hai nada feito e en Noia levan as instalacións e persoal do Grumir varios anos funcionando a bo nivel
  

O director xeral de Emerxencias e Interior, Santiago Villanueva, ofreceu unha rolda de prensa acompañado pola delegada territorial na provincia, Belén do Campo, o presidente da Federación Galega de Municipios e Provincias (Fegamp), José Manuel Rey, e o deputado provincial de Promoción Económica

Noia, 8 de febreiro de 2013.- A Xunta, en colaboración coa Deputación Provincial e os concellos, poñerá en marcha sete grupos de emerxencias supramunicipais (GES) na provincia da Coruña, co fin de completar a redefinición do mapa de emerxencias de Galicia. Así o explicou hoxe o director xeral de Emerxencias e Interior, Santiago Villanueva, na Coruña, quen indicou que estes grupos sumaranse aos 10 parques comarcais de bombeiros e aos tres municipais da Coruña, Ferrol e Santiago de Compostela para crear "unha auténtica malla que cubrirá a totalidade do territorio da provincia nunha distribución máis racional dos recursos", segundo a nota da Xunta, que non está a ter en conta as protestas dos veciños de Noia e as queixas dos alcaldes de toda a comarca de Barbanza, a maioría do PP, que non entenden que se queira abandonar un grumir xa asentado como o de Noia e comezar dende cero outro en Muros.

Acompañado pola delegada territorial na provincia, Belén do Campo, o presidente da Federación Galega de Municipios e Provincias (Fegamp), José Manuel Rey, e o deputado provincial de Promoción Económica, Antonio Cañás, Villanueva sinalou que os novos grupos de emerxencias estarán compostos por 12 efectivos. Superarán así o modelo anterior de Grumires, ao contar cunha estrutura supramunicipal que lles permitirá dar servizo a varios concellos e cubrir partes máis amplas do noso territorio. Ademais, disporán dunha estrutura profesionalizada e permanente.

O novo mapa de emerxencias, por tanto, disporá de sete sedes dos grupos: Ortigueira, Mugardos, Curtis, Ponteceso, Muros, Padrón e Brión. O grupo con sede en Ortigueira dará cobertura á área de Ortegal; o de Mugardos cubrirá o Eume e Ferrol; o de Ponteceso cubrirá Bergantiños; desde a sede de Muros darase servizo á zona de Muros-Xallas; desde a base de Curtis atenderase a área de Betanzos, Terra de Melide e Ordes; desde a de Padrón cubrirase o ámbito do Sar-Caldas e, por último, a sede de Brión actuará sobre Santiago, Noia e A Barcala.

Segundo apuntou o director xeral de Emerxencias, xa se está traballando coa Fegamp para a implantación destas actuacións, de xeito que o servizo comece a funcionar no mes de abril. O custe anual dos grupos para toda Galicia rondará os 7,5 millóns de euros. A Xunta farase cargo do 60% deste importe, mentes que as deputacións provinciais e os concellos asumirán o 20%, respectivamente.

En relación ás queixas dalgúns concellos por non contar cunha sede propia de Grumir, o responsable de Emerxencias recordou que “esta distribución está baseada nun acordo entre Xunta e Fegamp, baseánse en criterios obxectivos e coa colaboración das Deputacións”.

“Tivéronse en conta condicións específicas para dar a mellor resposta ante as emerxencias, como a poboación atendida, a localización en zonas con riscos potenciais ou a existencia de medios e recursos municipais na actualidade que se poidan a aproveitar”, apuntou Santiago Villanueva. “Ademais –engadiu- evitáronse duplicidades, de xeito que ningún grupo de emerxencias se instalará alí onde haxa un parque de bombeiros, tal e como se establece no Pacto Local”.

O cumprimento do obxectivo de crear unha auténtica malla que cubra todo o territorio e ofreza unha resposta áxil e eficaz aos cidadáns galegos ante calquera incidencia, destacou o director xeral, “non sería posible sen a colaboración entre as distintas administracións, non só entre a autonómica, as Deputacións e os concellos, senón tamén entre os propios concellos, que, na liña impulsada pola Xunta, cooperarán entre si para ofrecer un servizo de resposta ante as emerxencias áxil, eficaz e profesional”.

Villanueva rematou a súa intervención destacando o salto cualitativo e cuantitativo que experimentou a nosa comunidade na atención das emerxencias en pouco máis dunha década, cando se pasou de contar no ano 2000 con sete servizos profesionais permanentes de atención ás emerxencias (nas sete cidades) a contar a partir deste 2013 con 60 servizos permanentes espallados por toda Galicia, grazas ao esforzo e coordinación das tres administracións implicadas.

Relacionadas:

• Noia: o Psoe ve como un "ataque brutal" da Xunta que saquen o Grumir local

• Noia: o Bng tamén irá á concentración a prol do Grumir

  

• Noia: o goberno local ve "unha aberración calamitosa" que se queira desmontar o Grumir e facelo algo novo en Muros

Posted via email from Certo.gl, o xornal dixital de Barbanza e Noia

Ribeira: Ámbar gaña o primeiro premio de fotografía do certame "Revélate e únete ao bo trato"

• Este concurso foi organizado pola Deputación de A Coruña con motivo da conmemoración do 25 de novembro de 2012 “Día contra a violencia de xénero”
  

Ribeira, 8 de febreiro de 2013. Segundo sinalan as bases deste certame, "o premio concederase a aquel traballo que coa creatividade, orixinalidade, calidade fotográfica e a contribución da imaxe proposta, a favor da defensa dos valores de igualdade de oportunidades entre mulleres e homes, convivencia positiva entre sexos e loita contra a violencia de xénero fomente actitudes positivas de bo trato entre mulleres e homes, que reflicten en relacións sas, baseadas na tolerancia, no respecto e a igualdade de oportunidades entre mulleres e homes. Valorarase nesta actividade a capacidade de xerar a través da fotografía un proceso de sensibilización, de impacto social e educativo".

A ollos do xurado, está claro que Ámbar conseguiu coa súa magnífica imaxe todo iso. E gaña por tanto, ademais do recoñecemento público, 1.000 euros en metálico. Parabéns!

Gañadores

CATEGORIA DE MAIORES
1º PREMIO:	Asociacion AMBAR  das persoas con diversidade funcional. Concello Ribeira Pseudónimo obra: Marea de gente
2º PREMIO:	Jose Luis Fernandez Esteller. Concello Touro Pseudónimo obra: En consonancia
3º PREMIO:	Deserto
CATEGORÍA INFANTIL E XUVENIL
	Deserto

Posted via email from Certo.gl, o xornal dixital de Barbanza e Noia

Arte: Manuel Moreno (Sevilla), Hugo Besard (Bélxica) e Tomasz Winiarski (Polonia) gañan o IV premio "Atlante" de gravado

•  Premio "Ramiro Carregal" para Deborah Chapman (Canadá)
• Mellor artista do Barbanza, a noiesa Ana Cambeiro
• A entrega de premios será a mediados de xullo, cadrando cun curso de verán da USC e a mostra de 70 dos máis de 200 gravados participantes
  

Artes, Ribeira, 8 de febreiro de 2013.- Os Premios Atlante que cada ano outoga a Fundación rexedora do Museo do Gravado de Artes foron fallados esta mañá. Nesta cuarta edición, resultaron distinguidos Manuel Moreno Morales (de Sevilla), Hugo Besard (de Bélxica) e Tomasz Winiarski (de Polonia). Manuel Moreno Morales xa ganara o II premio Atlante, como poden comprobar na súa biografía.

Cada un dos tres gravados galardoados (titulados Chevaux Volans IX no caso do sevillano e Sagrado buitre ibérico no do belga, mentras que o polaco non presentou nome ningún) está recompensado con 2.500 euros: mesma dotación económica que se concede ao Premio Ramiro Carregal Rey, que nesta ocasión recaeu en Deborah Chapman, de Canadá. O título da súa obra, El alma renovada.

En canto ao Premio Barbanza/Ría de Arousa co que se pretende poñer en valor aos artistas locais, a vencedora foi a noiesa Ana Cambeiro Cambeiro con Modelo y patrón.

Finalistas

Ademais, de entre as 219 obras presentadas de 23 países, resultaron finalistas en virtude da súa gran calidade os gravados elaborados pola lucense Isabel Somoza (sen título), o madriñelo Juan Lara Hierro  (C_M – Serie Miradas) e o leonés Germán Aparicio (sen título). Ademais, foi finalista do Premio Premio Barbanza/Ría de Arousa a noiesa Rosana Calvo Agraso (El barco).

Nesta cuarta edición, o xurado estivo formado por José Manuel López Vázquez, profesor da Universidade de Santiago de Compostela (USC); Juan Monterroso Montero, decano da Facultade de Historia e profesor da USC; Daniel Buján, director da Biblioteca de Galicia; Carmen Hermo, profesora e pintora; Isabel Pintado, gravadora e pintora; e Alfonso Costa, pintor e gravador.

Tamén compareceron na presentación do fallo a directora do museo, Rocío Hermo; e o presidente da Fundación, o alcalde de Ribeira Manuel Ruiz Rivas. quen manifestou que esta cuarta edición, con 23 países representados, entre os cales hai algún novo con respecto a convocatorias anteriores (Canadá e Israel), significa a consolidación dos premios e contribuén a seguir dando a coñecer o museo e o arte do gravado.

Curso de verán

Ademais, Manuel Ruiz informou de que a entrega de premios está prevista para mediados de xullo, coincidindo coa celebración dun curso de verán da USC sobre a pegada do gravado. Simultáneamente exhibirase unha exposición cunha selección dunhas setenta obras de entre as 219 presentadas.

No nome do xurado falou Alfonso Costa, quen fixo fincapé na variedade e calidade técnica das obras distinguidas (collage, polímero, auga tinta, auga forte, da maneira negra...).

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: a pista "Irmáns González Pérez" de Carreira lembrará a estes futbolistas como modelos para a mocidade

• Centos de nenos e veciños estiveron apoiando aos dous irmáns de Carreira homenaxeados de novo con esta pista, moi preto do lugar onde comezaron a darlle os primeiros toques ao balón
• A nova pista multideporte está no recinto do colexio de Frións
  

Ribeira, 8 de febreiro de 2013. Neste luminoso venres de Entroido tivo lugar no recinto escolar do CEIP de Frións o acto inaugural da nova Pista Multideportiva ‘Irmáns González Pérez. Fran e José Ramón’, co que se quixo render homenaxe dende o Concello a unha das parellas de irmáns con máis sona na historia do deporte de Ribeira.

Presidido polo alcalde de Riveira, Manuel Ruiz, o acto contou por suposto coa presenza dos dous futbolistas de Carreira que marcaron época no Superdepor. Ademais, participaron no evento o que fora adestrador daquel equipo mítico, Arsenio Iglesias; Andrés Pardo, dos veteráns do Deportivo; o ex rexedor municipal José Antonio Ventoso; e o director do centro escolar, Luís Teira. Fronte a eles, centos de persoas, entre alumnos, veciños, familiares e achegados, e tamén membros da Corporación.

Medalla de ouro

O primeiro dos irmáns en tomar a palabra foi Fran González, quen agradeceu ao Concello esta distinción, que se suma á Medalla de Ouro de Ribeira que se lles outorgara hai uns anos.

Tanto Fran como José Ramón quixeron lembrar igualmente que, no mesmo lugar onde agora se ubica o recinto educativo, na súa infancia se estendía un campo de fútbol no que eles solian xogar ao estar situado ao lado da súa casa.

Fran expresou a súa ledicia de poder seguindo disfrutando do deporte coa nova pista, en tanto que José Ramón salientou que aínda que foi unha mágoa perder aquel campo foi unha sorte que o substitúa un centro educativo. O maior dos irmáns González Pérez quixo recordar tamén aos amigos da infancia cos que xogaba ali ao fútbol, como José, Pirri ou Julio.

Previamente, o alcalde Manuel Ruiz (quen falou despois de que Luís Teira dese a benvida como anfitrión) destacou os éxitos deportivos de dous irmáns que, convertidos nos buques insignia do Deportivo de A Coruña, levaron con orgullo os nomes de Ribeira, de Carreira e de Frións por todo o mundo. “Agora o que queremos e que o seu nome quede aquí estampado por moitos anos –engadiu- para que todos teñamos o recordo dos que foron os nosos máximos deportistas de élite”.

Ruiz Rivas tamén lembrou que o ano pasado o Concello tivo ocasión de inaugurar outra pista multideporte en Abesadas, á que se lle dou o nome da primeira parella de irmáns que de xeito profesional chegou a competir na élite do fútbol: os irmáns Parada Alvite, Suco I e Suco II.

Panel e mural

Despois da rolda de intervencións, os irmáns González descubriron o panel conmemorativo no que se resume a traxectoria profesional de cada un deles e, acto seguido, tiveron ocasión de contemplar un mural que sobre as súas figuras estiveron a elaborar alumnos da escola ao longo desta semana para festexar a ocasión.

Para finalizar, alumnos do CEIP de Frións farían uso das novas instalacións deportivas.

See the full gallery on Posterous

Posted via email from Certo.gl, o xornal dixital de Barbanza e Noia

Sociedade: "Stop Desafiuzamentos" do Barbanza acada colaboración do Concello de Ribeira

• As case 20 familias afectadas por este problema en Ribeira terán un seguimento dende Servizos Sociais para botarlles unha man se o precisasen
  
• O vindeiro sábado 16 de febreiro acudirá a unha manifestación en Vigo para apoiar as reivindicacións dos prexudicados pola hipoteca
  

Ribeira, 8 de febreiro de 2013. A plataforma "Stop Desafiuzamentos" do Barbanza non para no seu labor de axuda ás familias afectadas polas hipotecas abusivas que se permitiron durante a burbulla inmobiliaria neste país. Nas súas múltiples xuntanzas, onde pide colaboración das diferentes institucións que representan aos cidadáns, sempre consegue algo: ou que alomenos escoiten as súas vindicacións, ou, como acaba de pasar no caso do Concello de Ribeira, que lles presten axuda directa. Así, o edil responsable de Servizos Sociais de Ribeira, prometeulles que van atender ás 17 familias afectadas por este problema con especial dedicación. Transcribímoslles totalmente a nota de prensa emitida por "Stop Desafiuzamentos":

Este pasado martes mantuvieron una reunión de trabajo en la casa consistorial de Ribeira, el Concejal de Servicios Sociales y Promoción Social así como teniente de alcalde, Vicente Mariño; la Trabajadora Social y Jefa de Servicio, Maria Francisca Vidal y el portavoz de "Stop Desahucios" del Barbanza, José Manuel Pena, al objeto de perfilar una serie de actuaciones de cara a mantener una estrecha colaboración del Concello con la Plataforma y ayudar a las familias afectadas por ejecuciones hipotecarias en sus viviendas habituales.
 
El teniente de alcalde, Vicente Mariño, se interesó por el número de familias afectadas por problemas hipotecarios, que actualmente son unas 17 en todo el municipio de Ribeira, y se comprometió a poner a disposición de todas esas familias el apoyo integral de todo el departamento de servicios sociales, desde el poder cubrir las necesidades básicas, (como alimentos, ropa...),  el asesoramiento legal y el apoyo psicológico a las familias así como la posibilidad de facilitarles la reinserción y el apoyo laboral necesario para la búsqueda de empleo. 
 
Esta fue la primera reunión de trabajo que se repetirá, por lo menos una vez al mes, al objeto de que tanto el Concello, como la Plataforma, conozcan de primera mano la marcha de las diferentes gestiones que se efectúan o necesitan realizar las familias afectadas al objeto de poder garantizarles el derecho constitucional a una vivienda digna. Por su parte, el portavoz de la  Plataforma "Stop Desahucios" del Barbanza agradeció la colaboración y el interés mostrado por parte de los responsables municipales así como de la máxima autoridad municipal y la receptividad manifestada ante estas situaciones de ejecuciones hipotecarias, que padecen muchas familias de nuestro entorno. 
 
    Saludos cordiales. 
    Plataforma "Stop Desahucios" 

Manifestación "Polo dereito a unha vivenda e contra o xenocidio financieiro"
 

 
  Este vindeiro sábado, 16 de febreiro, terá lugar unha manifestación que sairá da Rúa do Príncipe en Vigo, de varias Plataformas de "Stop Desafiuzamentos" de Galicia, "POLO DEREITO A UNHA VIVIENDA, E CONTRA O XENOCIDO FINANCEIRO".
 
  Os membros da Plataforma que queiran ou poidan asistir deben onfirmar a asistencia para ollar a posibilidade de poñer un autobús ou ben achegarse en vehículos particulares. 
 
  "Ada Colau" (Plataforma Afectados por la Hipoteca de Barcelona) dixo na Comisión do Congreso de los Diputados, hai uns días: " DECIR QUE LA LEGISLACIÓN ESPAÑOLA ES ESTUPENDA CUANDO HAY PERSONAS QUE SE ESTÁN QUITANDO LA VIDA POR UNA LEY INJUSTA ES ABSOLUTAMENTE CRIMINAL". 
 

Posted via email from Certo.gl, o xornal dixital de Barbanza e Noia